Ксенија Николова: Љубов кон самите себе е лекот против „емотивните манипулатори“

14 декември 2017

Вчеравечер младата авторка Ксенија Николова ја промовираше нејзината нова, четврта по ред книга „Емотивен манипулатор", во издание на „Култура".

Со Ксенија поразговаравме за приказната полна со емотивен набој и поривот што ја поттикнал да ја создаде.

„Оваа приказна е приказна на која работев изминатава година за на крајот од истата, да ја споделам со публиката. Овој роман е полн со емоции, вистини и предизвици, кои раскажани преку животот на Катја (главната хероина ) креираат една реална слика во која секој од нас може да се најде. Овој роман зборува за емотивната манипулација, за последиците од истата, за депресијата и конечно за љубовта кон самите себе која единствено може да не заштити од сето тоа", објаснува писателката.

Овој пат нејзината книга е во издание на издавачката куќа „Култура".

„ Со оглед на одличната досегашна соработка и заедничкиот елан кој го имаме, сигурна сум дека ништо не е случајно. Се' што можам да кажам е дека ми е чест да бидам дел од вистинска издавачка куќа која вистински застанува зад мене и моето дело", вели Ксенија и додава дека ова е книга во која нејзините читатели може да го очекуваат истиот бран на емоции, истиот искрен и едноставен пристап на вистината, раскажан од сосема друг агол, за прв пат, раскажан во женски род.

На прашањето „Кој е емотивниот манипулатор", Ксенија вели:

- Тоа е некој кој сопствените фрустрации ги лечи така што, создава нови некому. Тоа е некој што ја грицка туѓата самодоверба и го убива духот на човекот со константни критики. Тој е опасен, но за него има лек. Љубов кон самите себе! Лекот е толку ефикасен, што од него бега за час. Проверено, потврдено.
На промоцијата на книгата, Ксенија изгледаше префинето и елегантно во дизајнерска креација од Елена Лука.

-Многу се радувам на финалниот производ кој ми го дизајнираа во Елена Лука. Се работи за класика, едноставност и елеганција. Јас сакам едноставни парчиња облека и речиси никогаш не експериментирам, не сум таков човек. Сакам да се чувствувам удобно и да бидам своја. Токму затоа и се одлучив за класични сако и пантолони, зачинети со доза уникатност, во сјај на прекрасна корално црвено боја.

„Емотивен манипулатор" може да ја најдете во сите продажни места на Култура по цена од 350 денари.

Објавено:
14 декември 2017
Категорија: 
Култура
Прочитано:
2.839 пати