Среќен роденден „Исцелител“!

9 ноември 2018

Годинава што изминува беше исклучително успешна за тимот на филмот „Исцелител“. На денешен ден пред една година имавме можност за првпат да слушнеме и да го погледнеме дебитантскиот филм на режисерот Ѓорче Ставрески.

Премиерата се одржа на Солунскиот филмски фестивал, каде за прв пат во 58 годишната историја на фестивалот македонски филм доби награда.

Оттогаш, „Исцелител ефектот“ се распространи низ целиот свет:

• филмот се прикажа на неверојатни 47 меѓународни филмски фестивали ширум светот од кои 3 беа од престижната А-категорија.
• освои 14 меѓународни, 4 домашни награди во дистрибуција и 4 награди во предпродукција. Повеќе од еден фестивал неделно и повеќе од една награда месечно.
• Најпознатите светски филмски списанија како „Холивуд Рипортер", „Варајати", „Скрин Дејли" и „Сенсес оф Синема" објавија ѕвездени рецензии.
• „ХБО", една од најпознатите телевизиски мрежи, од 31-ви декември 2017г. почна да го емитува Исцелител во 14 земји во Европа. Тој е првиот македонски филм достапен на услугата „ХБО-ГО".
• Повеќе од 23.500 гледачи го погледнаа „Исцелител" во 26 градови низ Македонија.
• На 6-ти јуни, во градскиот парк во Скопје, филмот ја имаше досега најмасовната проекција на отворено во Македонија.
• Исцелител е дел и од азиската интернет телевизија, „Синема Ворлд".
• Имавме успешна кино дистрибуција во Грција.
• Исцелител е македонски кандидат за Оскар од неанглиско говорно подрачје за 2019 година

На линкот ТУКА, ќе видите и мапа со сите места во светот на кои „Исцелител“ освои награди, учествуваше на фестивали, се прикажа во кино и на телевизија и нè направи сите горди!

За потсетување, главните улоги во „Исцелител" ги толкуваат: Благој Веселинов и Анастас Тановски, а останатите улоги: Аксел Мехмет, Димe Илиев, Александар Микиќ, Мирослав Петковиќ, Симона Димковска и други. Автори на музиката се Бранислав Николов, Пеце Трајковски-Брада и Гоце Јованоски, директор на фотографија е Дејан Димески, монтажер Мартин Иванов, а сценарист, режисер и продуцент е Ѓорче Ставрески. Филмот е во продукција на Фрагмент филм од Скопје и во копродукција со ГРААЛ С.А. од Грција.

Среќен роденден „Исцелител“!

Објавено:
9 ноември 2018
Категорија: 
Култура
Прочитано:
169 пати