Стинг како најамбициозен проект на Авалон ќе настапи на спектакуларна сцена

21 мај 2019

По рекордно распродадениот концерт во ВИП Арената „Борис Трајковски“, Стинг повторно се враќа во Скопје на спектакуларен концерт на градскиот стадион на 02 – ри јуни.

Концертот е дел од турнејата на музичката легенда насловена како „My songs“, а во Скопје ќе испее дел од најпопуларните песни од неговата соло кариера и дел од оние од времето на „The Police“.

На денешната прес конференција организаторите „Авалон“ истакнаа дека останале уште мал број карти за концертот за кој ќе кажат дека е најамбициозен проект на продукцијата досега, не вбројувајќи ги оној на Џејмс Браун и Карлос Сантана. 

Специјален гостин на концертот е македонската музичка легенда Влатко Стефановски, кој на 2 – ри јуни ќе настапи со неговото трио сочинето од синот Јан Стефановски и за него, неверојатното откритие од Струмица, Иван Кукиќ.

За време на неговиот едночасовен настап, виртуозот истакна дека и тој ќе испее дел од неговите најпознати песни и дека веќе напорно работат на средување на репертоарот.

На шега, додаде и дека за времето што го имаат мора да дадат три гола на домашен терен, а со оглед на неговата неверојатна кариера и исклучителни песни, во тоа воопшто и не се сомневаме.

Тој воопшто не ја криеше возбудата што ќе настапи пред музичката легенда, а рече и дека се надева дека тој ќе има и малку време за да се запознаат. Иако досега имале заеднички соработници со кои и Стефановски настапувал, никогаш не се појавиле заедно на сцена, па оттука и возбудата е поголема.

Подеднакво возбудени се и неговиот син и младиот Иван кои се дел од Влатко Стефановски трио, како бран свежина и нов софтвер за виртуозот.

Она што мора да го споменеме, а го посочија од продукцијата е тоа што Стинг ќе настапи на иста сцена како онаа во ЕГЗИТ, што уште еднаш говори за тоа колку овој концерт ќе биде спектакуларен. Токму оттаму, неколку дена претходно доаѓа и комплетната продукција за сè да биде навремено и соодветно наместено за настапот на 67 – годишната музичка легенда.

Бобан Милошевски од Авалон информираше дека можеме да очекуваме публика од околу 20 до 30 илјади, бидејќи овојпат нема гратиси, а влезниците се во ограничен број.

Објавено:
21 мај 2019
Категорија: 
Култура
Прочитано:
784 пати