FKA Twigs: Туморите на матката ми ја уништија самодовербата како жена

10 мај 2018

Популарната пејачка FKA Twigs деновиве во искрен коментар објавен на нејзиниот Инстаграм профил изјави дека неодамна ѝ биле извадени дури шест тумори од матката на сериозна операција.

Пејачката вели дека ова ѝ ја уништило самодовербата како жена и имала потреба да го раскаже искуството јавно и да посочи дека сите жени кои се соочиле со оваа дијагноза и операција се големи борци.

Таа напиша дека туморите биле огромни и секојдневно чувствувала неверојатна болка, а докторите во болница ѝ рекле дека истите биле како да е шести месец бремена.

„Бев толку многу исплашена и покрај огромната љубов и поддршка што ја добив од пријателите и семејството, се чувствував сама, без трошка самодоверба“, напиша таа на Инстаграм.

Како што ќе каже, постојано се обидувала да биде храбра, но тоа биле невозможно и толку исцрпувачко на моменти што ја натерало да се посомнева дали некогаш ќе се чувствува исто во нејзиното тело.

„По неколку месеци, денеска играв повторно со мојата кореографка и се чувствував како старата јас по долго време и тоа беше магично“, напиша пејачката.

Имено, доктор Трејси Мајлс за Би-Би-Си објаснува дека во нејзиниот случај станувало збор за бенингни тумори кои растат на ѕидовите на матката.

„Истите се многу чести и може да се појават во различни големини. Ако се мали, многу често не знаеме дека ги имаме. Може да се болни и да крварат, но и да се повлечат по менопаузата“, објаснува таа.

Пејачката го заврши постот говорејќи им на сите жени кои се соочуваат со истата дијагноза дека не се сами и дека проблемот може да се реши.

„Сакав да ви кажам од моето искуство дека сите сте неверојатни борци и дека не сте сами. Можеме да поминеме низ ова“, вели FKA Twigs.

Извор: Би-Би-Си

Објавено:
10 мај 2018
Категорија: 
Стории
Прочитано:
520 пати