Јадран во лето '80

Порано, немавме клима во автомобилите, но не ни пречеше да патуваме со часови до омилената летна дестинација - а тоа најчесто беше некаде на Јадранот, ма да и Охрид и Преспа беа добра "конкуренција".

Во автомобилите ред песна, ред караница, ред детски џагор (симпатичен, некогаш не), со подтовени сендвичи и сокчиња и вода, сите учествувавме во создавањето на атмосферата што му претходеше на одморот.

Наместо селфи, имавме по некоја фотографија од аналоген апарат, ако имаме среќа да излезе некоја добро. Но, затоа секогаш се купуваа разгледници. И за разлика од сега, стасуваа побрзо, поздравот навистина пристигнуваше од Јадранот додека сте уште таму.

А некогаш се купуваа чисто за да се впише датумот и годината, да се сеќаваме каде сме летувале. Да додадеме уште една во колекцијата.

Имаше и тогаш смели костими за капење, дотерани жени, морнарски маици и кратки панталончиња. Но, пред се' имаше безгрижност.

Немаше филтер, тоа што го гледаш, тоа е. Го доживуваш, го паметиш.

Во тие 80ти имаше среќа, копнеж, возвуда, љубови кои останаа само таму... Не дека и денес ги нема каде и да појдете, но како веќе да не ги доживуваме на истиот начин. Има некоја посебна магија во исчекувањето покрај некоја фонтана, споменик, под нечиј прозор или слаткарница. Имаше магија во другарството создадено тука и сега, на собиранките покрај звуците на гитара и пеењето песни.
Се сеќавате ли вие дами на некој ваков одмор, кој ви буди драги спомени? Се сеќавате ли можеби на првиот летен одмор?

Во галеријата ве потсетуваме на модата во 1980-тите години, за време на летото на Јадран. Смели костими за капење, наспроти стајлинзи со џемпери, ленти за коса, интензивни бои... Фото: Ф. Клариќ

27 јули 2015