Среќен роденден ЛИЛА: Стилот на водителката низ 50 фотографии

Нашата позната водителка и тв лице Лила, го прославува својот 50 роденден. Препознатлива по својот глас и енергија, низ годините остана доследна на својот професионализам и популарност кај публиката, а како јавна личност ја гледавме во различни модни изданија.

Иако приватно најчесто ќе ја видите во џинс или хеланки, нејзината професија ѝ овозможи да облече креации и тоа најчесто дизајнерски, за што сме имале да шанса да посведочиме во многуте заеднички средби и соработки како медиум.

Имено, водителката повеќе од една деценија е заштитно лице на македонската модна куќа Елена Лука, па на јавните појавувања често ја гледаме во нејзини креации.

Обожавателка е на високи потпетици, а иако во младоста не крие дека експериментирала со изгледот, веќе со години наназад преферира црна боја, а ја задржа женственоста - кога е естетиката на модните парчиња во прашање. Не стравува да носи и бои, да се истакне со сјај и светки или пак да биде сексапилна, па во тој поглед и смела.

Од своето име успеа да изгради бренд, па без разлика дали ви се допаѓа нејзиниот изглед, стил, факт е дека каде и да се појави привлекува внимание.

Ретко дава интервјуа, а во последното кон почетокот на годината за нашиот медиум изјави дека лојалноста е денес луксуз. Разговорот во кој зборува за нејзиниот животен пат од „сестрата со карминот" до „писателката со фустанот", за секојдневието, жените и годините, соништата и реалноста и секако модата можете да го прочитате тука.

По повод нејзиниот 50 роденден, ние пак ѕирнавме во нашата архива и одбравме 50 фотографии со кои правиме модна ретроспектива на стилот на едно од најпрепознатливите тв лица кај нас.

Лила, среќен роденден, ти посакуваме уште поблескави наредни 50!

14 октомври 2021