тема

Му кажува ли модата збогум на сексот?

Интервју со
fashionel.mk
1 јули 2021

Ангелите на „Victoria's Secret“ ги спуштија крилјата. Оваа вест беше шокантна за консументите на модна содржина, бидејќи овој бренд без разлика дали ви се допаѓа неговата естетика или не, донекаде се сметаше за „остаток“ од она што во декадите како 80-тите и 90-тите беше доминатно - „Совршено секси тело кое продава“.

Совршените тела, секси долна облека и гламурозни шоу-а, нешто што се „голташе“ со очите (а и со џебот), одеднаш велат станало неинтересно за пазарот, кој сака пред себе да види слика во која ќе се препознае.

Па, „секси“ стана она во што можеш да се препознаеш.

И одеднаш „Victoria's Secret“ пласираше нов концепт, стратегија, со новото секси.

Сепак, сега повторно гледаме голи тела, но во поинаков облик. Практично, тие не се откажаа од главната стратегија од претходно, само го сменија “пакувањето“. Го понудија она што новите генерации сакаат да го чујат и видат.

Овој тренд секако не е наметнат од нив. Веќе неколку години наназад, а посебно во време на пандемија, се стави акцент на карактерноста, на индивидуалноста. Некој би рекол – мошне иронично, бидејќи на социјалните мрежи каде што и најмногу се следи модата во последно време има најмалку индивидуалност меѓу консументите.

Victoria's Secret некогаш и сега


Кој ги наметнува промените и дали се реални?

Генерацијата Z (1997 до 2015) се наметна како валидна за тоа што е тренди, за тоа што е  добро, за тоа каква треба да е иднината, а таа има поинаков став за тоа како треба сексот да се користи во маркетинг цели, за разлика од претходните генерации. Според нив, најдобриот бренд е „Гучи", а „Гучи" не пласира сексуалност во своите кампањи, туку вниманието го привлекува со еклектични, но удобни комбинации, а за оваа генерација комфортот и самоизразувањето се доминантни. Во тоа веројатно им помогна доминацијата на социјалните мрежи кои станаа главна маркетинг пларформа, бидејќи од друга страна,  тие сè уште не се (толку) финански моќни за да поставуваат такви стандарди на пазарот, во однос на консумеризам. Тука дефинитивно доминираат Миленијалците, ако тие се прашуваат -  „сексот сè уште продава“.

 кампања на Rag&Bone ss21

Marine Serre, 20/21

Ние пак, на оваа тема позборувавме со Снежана Богдановска – Сани (модел и моден новинар) и Алек Наумовски (модел и дел од модната агенција Моделс Ин Менаџмент). И двајцата како дел од модата од различни аспекти, дадоа свое видување за овој нов тренд, кој има претензија да прерасне во сосема нова модна ера.

Дали ваквите промени се случуваат затоа што навистина претеравме со објективизирањето на телото или се поттикнати и од други актуелни случувања, Сани вели:

-Тоа е модус вивенди во модата. Едната крајност преминува во друга. До пред некоја година индустријата ја извулгаризира и злоупотребуваше сексуалната конотација толку многу што објективизирањето на телата стана бизарно и банално. Пред неколку години дојде до промена на фокусот меѓу брендовите кои во тоа време беа дефиниција за мејнстрим сексот, а што значеше претежно тела што се:  бели,  нестварно убави и практично секогаш многу млади. Да се потсетиме дека пред две години, модната ревија на „Victoria's Secret“ ( парада на незамислив кич на сите нивоа) беше откажана по низата скандали поврзани со брендот, а некои (до неодамна) неприкосновени имиња на модната фотографија завршија во обвиненија од модели за сексуална злоупотреба. Која страна и да ја заземете по овие прашања, тоа беше доволно за да се одземе сексипилноста на фотографиите кои се вртеа околу сексот. Од друга страна, сликите што ги добиваме сега се далеку со светлосни години од оние што модниот мејнстрим ги подразбираше сите овие години. Тие веќе немаат никаква врска со сјајната сексуалност што ја врзуваме за Том Форд (и од која тој самиот започна да се воздржува кога станува збор за маркетинг) или фотографиите потпишани од Тестино и Ричардсон (двајцата обвинети за некои форми на сексуална злоупотреба).

По присилното успорување и нарушувањето на нормалните текови, модната индустрија прави сè што е во нејзина моќ да ни покаже колку еволуирала. Една од првите ставки на кои се однесува ова се модернизираните ставови за сексот и сексуалноста, за неговите безброј лица и за фактот дека денес, во ерата на #MeToo, практично е норма да се обиде да го претстави сексот од друг агол отколку што го гледа бел хетеро мажјак. Ова е промена која и без ковид мораше да се случи. Впрочем, модата е таа која ги предвидува модните текови и е огледало на општествените настани.

За тоа пак, кој најмногу ги предизвикува промените со кои се соочуваме, Наумовски смета дека е спој од повеќе работи.

- Останува главните играчи да ги креираат промените во модната индустрија - под главни мислам на дизјнерите, уредниците на модните списанија како и сопствениците на големите брендови. Социјалните мрежи и движењата се логична последица на претходните бранувања. Општеството, можам да додадам, е огледало на модната сцена или пак се некако меѓусебно поврзани, па точно можеме да видиме какво ни е опкружувањето. Ако некогаш се чекало и по три месеци за да се добие некоја колекција во продавниците, сега со интернетот и социјалните мрежи ја добиваме веднаш, тука се и главните придобивки од сите тие општествени и модни насоки.

Кампања на Ботега Венета за пролет 21

Како челно лице на модна агенција, го прашавме дали се забележуваат промени и при побарувачката на модели.

-Да разбирливо е дека има голема разлика од порано, имено во последниве години констатирам дека многу повеќе им се интересни моделите кои имаат некаков сопствен печат или некаква специфика по кои се различни од повеќето убави модели. И тука не е доволен само добриот изглед, се гледа колку моделот има изградено некаков стил, начин на комуникација и добра трансформација. Што се однесува на модните трендови тие се менуваат постојано, но моделите треба први да се прилагодат на овие промени ако сакаат да работат повеќе сезони – вели Алек.

 

Сведочиме ли на нова модна револуција?

Првата секси реклама е направена за цигари Pearl Tobacco во 1871 година, што „повлече нога“ за и останати брендови за цигари во тоа време да се одлучат на истиот чекор во рекламирањето и пласирањето на своите производи. Уште од тогаш беше јасно дека сексот продава.

Во 1920-тите истата стратегија се наметна и во козметичката индустрија, односно во рекламите за сапун. Woodbury Soap е првата компанија која употребува гола фотографија за да го пласира својот сапун.

Но, веројатно ниту една индустрија не се потпре на оваа стратегија како модната. Од 70-тите па до крајот на 90-тите, брендовите како „Калвин Клајн“, „Долче и Габана“, „Дизел“, „Левис“ ја базираа својата реклама (исклучиво) на секс. Тие ја оформија дефиницијата на „Sex Sells in Fashion“. И покрај тоа што на пример, кампањите на повеќето од споменатите брендови беа забранувани, секогаш го наоѓаа патот до потрошувачите и се комуницираа како успешни. „Калвин Клајн“ до денес не се откажа од сексот како главна алактка во работењето на нивната модна компанија, а бројките велат дека неговиот приход не забележува пад.

Имало ли низ историјата на модата и порано вакви периоди кога се форсирала разноликост, карактерност, како сега, па сме ги подзаборавиле бидејќи Том Форд, „Калвин Клајн“ и другите ни оставиле впечаток што сè уште трае или пак сведочиме на нова модна револуција?

Калвин Клајн, 1992

Жакемус, 2021

 

Сексуалноста привлекува внимание, но и што друго?

Идеалот на совршенството беше она по што се копнееше некогаш, па макар и никогаш да не го достигнеме. Со крофни и хамбургери во рака се купуваа магазини со слаби манекенки на насловните страни, со желба некогаш да се достигне тој изглед, истовремено посегнувајќи по уште еден залак брза храна. Се купуваше надежта, желбата, се купуваше сонот. Во меѓувреме и модата стана брза, начинот на живот стана брз, промените станаа неминовни.

По што реално се копнее сега?

-Копнежот по совршенство е во сржта  на човековата природа. Совршенството е Господ и тоа секако е недофатливо, но нели човекот е создаден по негов образец па тежнеењето кон совршеното ќе е животна движечка сила. Новоискреираниот концепт на политичка коректност е само еден од триковите по кои посега модата кога ќе западне во криза, и не верувам дека долго ќе трае. Упатувањето да се прифатите себеси такви какви што сте без обиди за позитивен напредок би значело дека немате потреба од целата таа индустрија која патем е трета по профитабилност во светот, што секако би било погубно.

Некогаш беше Џеки Кенеди наспроти Мерилин Монро, денес Ким Кардашијан наспроти новите лица на Victorias Secret?! – смета Богдановска.

Валентино 2020/21

Валентино 2020/21

Во однос на тоа дали младите станаа резистентни на сексуална модна содржина и кога тоа што се пласираше како модна порака имаше повеќе смисла некогаш или сега, Снежана ќе рече:

-Ниту една индустрија не се потпира толку многу на сексуалноста во своето рекламирање како модата. Да се потсетиме дека во 70-тите, 80-тите и 90-тите години на минатиот век, модните компании се фокусираа на сексапилот за зголемување на продажбата. Одењето во продавница се чувствуваше како да влегувате во ноќен клуб. Насочувајќи ги младите возрасни лица, оваа стратегија очигледно им успеа, со видно зголемување на продажбата. Сексот дефинитивно продаваше облека. Дали и денес функционира истиот рецепт?

 Провокацијата е начин да го завртите вниманието на себе, но само ако е во соодветно и рамките на добриот вкус. Многу контраверзни реклами минувајќи ја границата беа осудени на пропаст и толкувани како навредливи. Публиката е денес попаметна и пообразована од било кога, а отвореното или неавтентично однесување наскоро се доживува како лажно и осудува внимание. Сексот во реклами често одржува лажни или несоодветни родови стереотипи. Мажите се прикажани како сексуално агресивни, а жените се зависни и помалку моќни. Ваквите стереотипи можеби функционирале порано, но не и сега. Постои разлика помеѓу алудирање на здрава, самоуверена сексуалност и обична маглина.  Во таа смисла да се надеваме дека Кардашијан влијанието конечно ќе спласне и дека пародичните изгледи ќе ги снемува од инстаграм профилите. Дека младите ќе почнат да усвојуваат една друга попрефинета естетика.

Гучи

Студијата од Универзитетот во Џорџија токму на тема дали сексот во модната индустрија сè уште продава, чии резултати се објавени годинава, покажува дека рекламите со сексуална содржина се уште и тоа како присутни. Нивната анализа се однесува на сексот во модните реклами во последните 30 години, а резултатите од преку 3.000 пролистани магазини покажува дека оваа стратегија сè уште не замира.

Од друга страна, одредени маркетинг агенции низ САД сметаат дека денес сексот сам по себе веќе не продава – мора да се стави во контекст на сексуална самодоверба, позитивност, здравје, моќност на жената. Сменет е наративот, па сега индивидуалноста е во преден план, а не тоа да се задоволат туѓите потреби. Сега фокусот е ставен на комуникацијата – со самите себе пред сè.

Постои редефинирање на она што е секси – па се добива впечаток дека новата дефиниција оди во насока на самодовербата, но во комбинација со удобност, нешто за што консументите веќе нема да прават компромис.

 

Дали „Сексот продава“ некогаш ќе замре во модната индустрија и маркетингот?

На тема што е денес секси, каква естетика никогаш нема да замре и дали денес можеме да зборуваме за идеали во модната индустрија, Наумовски ќе каже:

-Под идеали јас ги разбирам модните трендови кои оставиле огромен траг во модната индустрија и се копираат и ден денес. Малиот црн фустан на Одри Хепберн, ајлајнерот на единствената Брижит Бардо, големите очи и трепки на Твиги, косата со таласи на незаборавната Вероника Лејк, како и симпатичната дијастема на актерката и модел Лорин Хатон. Додека пак секси може да биде нечија појава, лежерноста со која ја носи кошулата, новиот бран на фризури (mullet, wolfie cut и shaggy), нечија тетоважа или искрената насмевка.

Брижит Бардо

Според мене преценети се разголените тела и наметливоста во голотија која невкусно ни се пласира. Има еден интересен факт дека модната индустрија е втор најголем загадувач на светот веднаш зад нафтената индустрија. Како растат овие индустрии така оставаат поголеми штети на природата, затоа искрено многу повеќе би сакал да се изнаоѓаат алтернативни решенија за да се ублажат последиците. (Покрај масовната злоупотреба на животните, туку би ги наброил загадените реки, остатоци од материјали во океаните, масовните  уништувања на шумите, како и отровните хемикалии кои се употребуваат во масовните производства). За мене лично најголемата естетика би била кога би се отфрлиле сите материјали од животинско потекло и би се размислувало многу повеќе да се употребуваат органски и природни материјали. Баш неодамна имавме соработка со Британската Амбасада каде нивната амбасадорка Рејчел Галовеј преку модна ревија промовираше Climate Action for a green future for all. За жал живееме во такво време кога ваков вид на естетика мене ми е многу поважен од било која временска рамка.

Жакемус

Ако ги анализираме камапањите после пандемијата (иако официјално не е завршена), ќе забележиме дека сексуалноста е повторно присутна, но овој пат во „реален“ контекст. Кампањата на брендот „Жакемус“ насловена како „L’Amоur“ во фокус го става допирот, нешто што ни недостасуваше долго време, или пак онаа на „Дизел“ кој во кампањата „When Together“ најми вистински двојки со различна сексуална ориентација или пак, кампањата на брендот „SuitSupply“ со мажи и жени како се бакнуваат додека се соблекуваат. Но, контекстот во кој се ставени е поинаков.

Каде сме ние во контекст на светот, колку на нашата модна сцена има индивидуален израз, а колку следиме трендови, Снежана вели:

„Следиме трендови, ама СЛЕДИМЕ, не создаваме. Уште поважен е начинот на кој тоа се прави. Колку е тоа буквален превод, а колку прилагоденост на условите, атмосферата и потребите. Колку е резултат на автентична карактер, а колку домашна реплика.

И со оглед на тоа дека во исто време имаме навидум сосема различни модни приказни, ги прашавме нашите соговорници, што мислат, дали сексот сè уште продава и како.

 
 
 
View this post on Instagram

A post shared by Diesel (@diesel)

 

- Сексот секогаш продава, но стандардите и визуелизацијата за разголеното тело како такво е изменето. Во ова време на социјални мрежи и достапност на огромен број на медиуми доаѓа до презаситеност на консументите и се губи мистичноста и еротскиот импулс. Кога ви е сè на дофат и на тацна тогаш ни голотијата не ви е интригантна. Оттаму логично ми доаѓа дека сексот продава, но сме  далеку од деведесетите години кога Кејт Мос и Џоел Вест ги красеа сите светски модни магазини во кампањите на Келвин Клајн за долна облека – вели Алек.

- Сексот продава, тоа е факт. Сексуалноста е дел од човековата природа и оваа базична пре-програмирана диспозиција да се одговори на сексуална дразба е непобитно моќна, па повеќе од  јасно е зошто постојано се користи во рекламирањето. Поради тоа веројатно никогаш и нема да престане да се користи како рекламна алатка. Прашањето само се однесува на формата, естетиката, етиката односно пораката во која е исфилувано. Да замре сигурно не, но дека се трансформира уште е посигурно. Стратегијата „сексoт продава“ е валидна за да се користи, но треба да се направи коректно за вистинската целна публика и за вистинската марка. И не само поради шок ефектот. Можеби тоа функционираше во 1871, во 80-те, па дури и во 2001 година, но не во 2021 година. Маркетинг агенциите би требало да се попаметни од тоа – смета Сани.

Сите ја паметиме рекламата на „Калвин Клајн“ со тогаш 14 годишната Брук Шилдс и прашањето: You want to know what comes between me and my Calvins? Nothing.

Што има денес (по)меѓу модата и сексот? Многу работи.

Политичка коректност, прифаќање на себеси, прифаќање на различностите, удобноста, крикот по самодоверба и (себе)прифаќањето, активизам, секс афери, политика... Модата секогаш била начин на комуникација, но денес мошне обременета. 

Промени се случуваат тоа е сигурно. Едните се потпираат на генерациите што доаѓаат, други пак на она што сигурно поминува. Сепак, сексот како маркетинг стратегија во модната индустрија нема да згасне и покрај тоа што добива нови (пот)контексти.

А какви уште промени ќе доживее - тоа допрва ќе следиме!

 

Објавено:
1 јули 2021
Прочитано:
1.042 пати