Македонија бира „Лице на годината“ по четврти пат

Во петокот по четврти пат се одржа кастингот за „Лице на Годината" во организација на модната агенција Моделс ИН од Скопје. Благодарение на одличната соработка со агенцијата од Белград - Моделс Скаутинг Офис (MSO), врвниот тим на букери предводени од Јелена Џокиќ и Катарина Весковиќ ја направија селекцијата на 12-те финалистки за да одберат „Лице на годината за Македонија“.

„Откако разговараа со нашите финалистки, ги разгледаа портфолијата и ги фотографираа девојките, со материјалот се вратија за Белград каде заедно со Јелена Ивановиќ ќе одлучат која од девојките треба да биде „Лице на Годината". Инаку Јелена е првиот човек на МСО и ја поседува лиценцата за овој престижен избор од каде излегуваат идните светски топ модели", вели Алек од Моделс ИН.

На самиот кастинг и како дел од агенцијата Моделс ИН присуствуваа и минатогодишните представнички на Македонија - Јована Нешова и Ивана Караџова, воедно направија и мал кастинг за момците.

Само да потсетиме на истиот овој избор во доцните 80-ти години, нашиот топ модел Надица Георгиева победи на ниво на цела Југославија, за потоа да направи успешна светска кариера.

За кратко време и официјално ќе дознаме кое ќе биде новото лице за Македонија што во Октомври ќе не представува на светскиот избор во Таормина - Сицилија. Официјален фотограф за целиот настан беше Бојан Стоилковски.