Од денес мобилни тимови на „Црвен крст“ ќе им помагаат на ранливите категории

18 март 2020

Од денес, Црвениот крст на град Скопје, во соработка со Пивара Скопје, почнува со реализација на активност наменета за обезбедување логистичка поддршка на ранливи целни групи на територија на градот Скопје.

Во функција ќе бидат ставени 10 мобилни тимови кои ќе бидат лоцирани на пет локации во градот, како и дополнителен тим за бездомните лица лоциран во Момин Поток.

Мобилните тимови ќе функционираат секој работен ден, од 08.30 до 12.30 часот, а нивната задача ќе биде да извршат неопходна набавка на лекови, прехранбени производи и средства за лична хигиена и истите да ги достават до домовите на старите, изнемоштени лица кои живеат сами, хронично болните лица, до семејства со лица со посебни потреби, самохрани родители и други ранливи категории на граѓани кои живеат во Скопје.

Целта на оваа активност е да им се овозможи поддршка на лицата на која таа им е најнеопходна, со што тие нема да имаат потреба да ги напуштаат своите домови и на тој начин да се намали ризикот од инфицирање со вирусот Ковид-19 .

Мобилните тимови ќе бидат составени од две лица од тимот за одговор при катастрофи, еден член од тимот за логистика и едно обучено лице за давање основна медицинска помош (парамедик). Сервисната услуга што ќе ја обезбедуваат мобилните тимови ќе биде бесплатна, а граѓаните ќе одвојат финансиски средства само за артиклите или лековите кои ќе треба да им се набават. Трошоците за функционирање на мобилните тимови ќе бидат покриени од Пивара Скопје, градот Скопје и општините во Скопје.

За повикување на мобилните тимови граѓаните ќе можат да ги користат следните телефонски броеви, според местото на живеење:
• Црвен крст Центар: 070/297-166 02/3115-029
• Црвен крст Кисела Вода: 070/379-456 02/3211-417
• Црвен крст Чаир: 070/208-383 02/2621-924
• Црвен крст Карпош: 071/349-230 02/3068-806
• Црвен крст Гази Баба: 071/243-078 02/2529-153
• Тим за бездомни лица 02/3096-227

Дополнително, исто така од денес почнуваат да функционираат и две СОС-телефонски линии на Црвениот крст на Град Скопје, преку кои секој работен ден од 09.00 до 13.00 часот граѓаните ќе можат да добијат психо-социјална поддршка за полесно справување со стресот предизвикан од актуелната состојба. Старите и изнемоштените лица на кои им е потребна психо-социјална поддршка можат да се јават на телефонскиот број: 075/352-246, а останатите граѓани на телефонскиот број: 071/379-119.
Овие активности се координирани и поддржани од страна на градоначалникот на Град Скопје и од градоначалници на скопските општини.

Она што Црвен крст ќе го прави кај нас, во Хрватска го прават граѓаните сами. Имено, на социјалните мрежи постојат две групи „Луѓе за луѓе“ и „Едни за други“ кои имаат преку 1.500 членови кои сакаат да помогнат. Со оглед на тоа дека повозрасните лица, кои спаѓаат во критична категорија, не користат често Интернет, направен е леток кој гласи вака:

„Доколку ви е потребна помош за набавка на храна, основни потреби и лекови, ѕвонете на ------- ние ќе го направиме тоа за вас и ќе ви го доставиме со сите мерки за заштита, за да не ве изложиме на ризик.

Поздрав и не двоумете се. Повикајте нè. ТУка сме.

Сосед ------- од бројот --------.

На тој начин Хрватите ќе се потрудат да помогнат, а и да го намалат метежот по продавниците.

Солидарност на дело.

Објавено:
18 март 2020
Категорија: 
Актуел
Прочитано:
124 пати