Анти-трендовите на Гучи за старт на миланската модна недела

18 септември 2014

Модната недела во Милано, една од најспектакуларните барем кога се модните имиња во прашање, започна вчера, ја отвори брендот Гучи, а не помалку внимание привлекоа и модните претставувања на Стела Жан и Алберта Ферети. Речиси кај сите е забележлива инспирацијата и влијанието од 1970-тите, но секако претставени со различен моден израз, што ги прави овие модни шоу-а уште поинтересни.

Гучи: Анти-трендот како тренд

collageglavna

Фрида Џианини, која слави десет години на позицијата уметнички директор на брендот, одлучи да ја заобиколи експерименталната мода и за следната сезона да понуди облека што секој би можел да ја носи. Токму таа одлука можеби некој ќе ја нарече како посегнување по анти-тренд, но Џианини ја става како доминатен тренд во колекцијата за пролет 2015. Ако минатата сезона по инспирација посегна по 1960-тите, овој пат интересот го насочи кон следната декада. Всушност, таа има способност да посегне по најдоброто од минатото и да му вдахне современост.

Гучи

Така, ќе се потсетите на шнирањето како главен моден детаљ, војничкото закопчување, златните копчиња... Колекцијата е составена од палета на бои во која доминираат портокалова, црвена, кафена, сина и зелена. Кога се материјалите во прашање, свилата е најзастапена, а дел од парчињата се изработени од шифон, тексас, кожа, како и детали од крзно. Свилени кимона, фустани со долги, широки ракави, здолништа со должина над колена, широки фармерки-панталони со должина до глужд, како и пижама костими се парчињата во кои дизајнерката ги замислува модните вљубенички. Она без што ниту една Гучи жена не смее да излезе од дома е кожен ремен. Брендот за пролет 2015 година ја претпочита елеганцијата и софистицираноста, наспроти разголеноста.

Стела Жан: Мултикултурна, младешка и свежа колекција

collagestela

И покрај тоа што е релативно нова на модната сцена и една од италијанските модни личности во подем, Стела Жан веќе успеа да се наметне со своја препознатлива естетика, од која не отстапи и овој пат. Совршен микс на мноштво бои и принтови, кои шират оптимизам е она што го покажа, а нејзиниот израз е исто така и мултикултурен. Во колекцијата може да се забележат и крајно женствени, но и крајно машкуданести модели. Но, без разлика, рамнодушни нема да останете. Стела сакала секој што ќе носи некое од нејзините парчиња - долги здолништа, топови како дрес, макси фустани како во 1970-тите, широки панталони... да се чувствува автенично. За секоја сезона, инспирацијата ја бара на ново место, па често патува, а овој пат ја најде токму во Милано, што може да се забележи и во дел од принтовите. Сепак, во коелцкијата е воочливо и присуство на афричката култура, на хаитската... Свежо, младешки и впечатливо.

Алберта Ферети: Романтичната страна на 1970-тите

collagealbera

Долги фустани од муслин и шифон, тантелни апликации, пердуви, хипи сандали, мокасини, гладијароки се нешто што ја отсликува романтичната страна на 1970-тите, декада која Алберта Ферети ја инспирираше, а кои ќе бидат едни од задолжителните парчиња следната сезона. Застапени се и комбинезоните, како и парчиња што во голема мера потсетуваат на пењоари. Кога се боите во прашање, пастелните доминираат, а дизајнерката истакнува дека сакала да постигне чувство на интимност, а не парчињата да се гледаат како на изложба. Сите оние што ја негуваат женственоста, нежноста и романтичноста, несомнено ќе посакаат да ги носат овие парчиња следната пролет.

Објавено:
18 септември 2014
Категорија: 
Колекции