Оваа пролет направете место за џинс здолништата од 90-те

Временската модна машина оваа пролет ни го враќа трендот од 90-те и раните 2000-ти, џинс здолништата кои во суштина и никогаш не ги заборавивме, но овојпат се најавуваат како хит тенденција.

Ако го чувате вашето омилено џинс здолниште во „молив" крој или во крој со плисе техника, сега е вистинско време повторно да му отстапите простор во вашиот стил.

Духот на новото време им дава една нова, свежа енергија на класичните модели на џинс здолништа, кои овојпат ќе ги гледаме и во неконвенционални кроеви, со асиметрични пресеци, во комбинација со други ткаенини, стилизирани во еклектични миксови, па дури и начинот како ќе ги носиме е малку поинаков и дозволува поголема слобода во комбинирањето.

Ќе ги носиме дури и во деловни комбинации, особено моделите со миди должина, со висок струк, кои совршено прилегаат со елегантна кошула или ролка и блејзер.