„Вог“ советува: 30 парчиња што жените над 30 треба да ги имаат во гардероберот

Дваесетите се години кога експериментираме, го бараме стилот кој најмногу ни одговара, истражуваме... Следната животна декада пак, носи доза сериозност, која се рефлектира и врз облеката што ја бираме. На оваа тема пишуваше и австралиското издание на магазинот „Вог“.

Тие направија листа на 30 парчиња што жените над 30 години треба да ги поседуваат во гардероберот. Ние ја пренесуваме во продолжение:

Мантил -Парче за сите пригоди, одлично за дождливи денови.

Црни чизми - Моделите до глужд ќе бидат идеални за во текот на целиот ден (и работното место и после тоа), но секогаш е добро да имате и едни високи.

Панталони со добар крој - ова е парчето во кое ќе изгледате добро и ќе можете да го вклопите лесно во деловниот стил.

Голема чанта - едноставна, практична и исто така одлична за деловниот стил.

Блејзер - „Ова парче со добар крој е најдоброто парче облека за возрасни“, вели „Вог'

Бела кошула - Ако до сега не сте имале макар една во гардероберот, задолжително инвестирајте и тоа во неколку што ќе ги менувате. 

Коктел фустан - За забави, вечерни излегувања, свечени поводи - ова парче ќе ви биде добредојдено и ќе ве спаси во многу ситуации.

Чанта која долго време ја посакувате - можеби е мала и во неа не може да ставите ништо освен телефонот, но до 30-тата морате да се почестите со една убава чанта која ја посакувате можеби и со години.

Патна торба - Инвестирајте во патна торба каква што доликува на една современа жена. Баталете ги ранците или малите торби во кои ги натискувате работите. И изборот на патна торба е исто така одлика на стилот.

Црни салонки - Никогаш не знаете кога ќе ви затребаат и во нив ќе имате чувство на самодоверба и моќ.

Фармерки со добар крој - одберете модел кој ќе му направи услуга на вашето тело и ќе го истакне најдоброто. Купете си од истиот модел фармерки во неколку нијанси и комбинирајте го во разни пригоди. 

Парче накит кој ќе го наследи вашата ќерка - Еден ден ќе ви бидат благодарни на тоа.

Фустан за формални пригоди - „Вог“ препорачува во гардероберот да имаме фустан кој ќе биде идеален за пригоди кои бараат свечен и прикладен дрес-код, безвременски вечерен фустан кој ќе ви се најде секогаш кога треба да играте на сигурно.

Градник кој совршено ви прилега - Нема потреба од објаснување. Тоа е задолжително парче во било која декада од животот.

Шик комбинезон -  Идеално парче за оние дами што не се обожавателки на фустан, а и да сте, постојат моменти кога можете дозата гламур да ја најдете токму во ова парче облека.

Плетенини - Џемпер, фустан, панталони - топли и практични во зимските денови.

Црн фустан - Модна класика која треба да ја имате секогаш во гардероберот, па дури и во повеќе варијанти.

Кожна јакна - Парче кое лесно ќе го вклопите во разни комбинации во сите годишни времиња. 

Комбинација во која секогаш ќе се чувствувате како „Девојка од милион долари“ - Без оглед на тоа дали се во прашање чевли, панталони кои можеби и не се најудобно или пак фустан кој отсекогаш сте сакале да го носите, дозволете си да имате парче во кое се чувствувате и изгледа моќно, убаво и со самодоверба.

Одело - Уште од оние комбинации во кои вреди да инвестирате, бидејќи се одлични и за деловни пригоди, но и за оние надвор од работното место.

Тренерка - Можеби ви е чудно што и ова парче се најде на листата, но секој од нас има моменти кога сака да се одмори и да ужива во удобноста што ја дава тренерката.

Пижама - а кога сме кај удобноста тука се и пижамите. „Вог“ советува да инвестирате во свилени, но нема да згрешите ако одберете и памучен модел, најважно е да се удобни и да се чувствувате убаво додека ги носите.

Сандали - Тука нема правила, бирајте го она што ви се допаѓа и најважно од се' модел што ви пружа комплетна удобност. Едно од најнепривлачните слики се оние на жена која чекори во неудобни чевли.

Свилена марама - Без оглед на тоа дали е овој моден додаток меѓу вашите омилени, сепак ова е уште еден моден класик кој може да ја направи вашата комбинација комплетна и впечатлива. 

Патики - Високи потпетици се секогаш потребни, но поеднакво се потребни и добри патики, удобни и практични.

Впечатливи обетки - што ќе ги носите гордо и ќе ги комбинирате со било кое парче облека од оваа листа.

Очила за сонце - Бирајте модели кои ви одговараат на обликот на вашето лице. Не бирајте тренд кој не ви прилега, бидејќи ќе изгледате смешно. А целта е да изгледате добро и впечатливо.

Часовник - еден од најпрактичните модни додатоци кој може да ја подобри вашата комбинација.

Бела маица - Може да биде додаток речиси во секоја модна комбинација и основно парче кое е добро да го имате во повеќе варијанти.

Капут - Клучно парче во зимскиот период. Инвестирајте во квалитетно, безвременско, за да можете да го носите повеќе сезони.

Што од оваа листа веќе имате во гардероберот?