Во историјата на Холивуд постојат многу трагични приказни, но малку од нив се толку необични, драматични и потресни како животот на актерката Сузан Кабот. Некогаш славена како една од најубавите на американскиот филм, жена која ги освојувала насловните страници и ги маѓепсувала филмските студија, на крајот од животот таа живеела изолирано, во страв и депресија, за да го дочека најстрашниот можен крај – да биде убиена од сопствениот син.
Родена како Хариет Перл Шапиро во 1927 година во Бостон, во сиромашно еврејско семејство, нејзиното детство било далеку од холивудскиот гламур. По разводот на родителите и сериозните семејни проблеми, дел од младоста ја минала во згрижувачки семејства и институции. Уште тогаш покажувала силен карактер и амбиција да избега од околностите во кои пораснала.
Во доцните 1940-ти и раните 1950-ти години започнала да добива помали филмски улоги, а наскоро го привлекла вниманието на големите студија. Под уметничкото име Сузан Кабот изградила кариера во холивудските вестерни и авантуристички филмови. Публиката ја памети по филмовите како Sorority Girl и War of the Satellites, но нејзината животна приказна подоцна ќе стане далеку попозната од филмовите во кои играла.
Најголемата мистерија во нејзиниот живот започнува во 1959 година, кога го запознава младиот јордански монарх Кралот Хусеин. Според документи кои подоцна станаа достапни за јавноста, средбата не била случајна. Во времето на Студената војна, американските служби работеле на зацврстување на односите со Јордан, а некои извештаи сугерираат дека токму посредници блиски до американските разузнавачки структури помогнале во организирањето на нивното запознавање.
Средбата прераснала во романса која со години била обвиткана со тајност. Кралот Хусеин бил познат како шармантен и харизматичен владетел, а Сузан подоцна за него ќе каже дека бил „најубавиот маж што некогаш го запознала“. Нивната врска морала да остане далеку од очите на јавноста. Освен политичките компликации, проблем претставувало и еврејското потекло на актерката во чувствителниот блискоисточен контекст на тоа време.
Во 1964 година Сузан Кабот го родила синот Тимоти. Со децении кружеле гласини дека токму кралот Хусеин бил неговиот биолошки татко. Тоа никогаш официјално не било докажано, но многумина верувале во таа верзија на приказната. Дополнителни сомнежи предизвикал податокот што подоцна излегол на виделина – актерката со години добивала месечни исплати од јордански извори, кои според некои правни експерти наликувале на форма на финансиска поддршка или алиментација.
Додека јавноста шпекулирала за нејзиниот однос со кралот, кариерата на Кабот постепено згаснувала. Холивуд се менувал, нови ѕвезди доаѓале на сцената, а улогите станувале сè поретки. Во текот на 1970-тите и 1980-тите таа речиси целосно исчезнала од јавниот живот.
Најтешкиот период допрва следувал. Нејзиниот син Тимоти страдал од сериозни здравствени проблеми поврзани со хормонален дисбаланс и нарушувања на растот. Односот меѓу мајката и синот станувал сè покомплициран. Во меѓувреме, Сузан се борела со депресија, осаменост и психолошки проблеми. Некогашната филмска ѕвезда живеела повлечено во мал стан во Лос Анџелес, далеку од светлата на Холивуд.
На 10 декември 1986 година се случила трагедијата што засекогаш ќе го обележи нејзиното име. Сузан Кабот била пронајдена мртва во својот дом, претепана до смрт. Првично Тимоти тврдел дека непознат напаѓач провалил во станот и ја убил неговата мајка. Но истрагата открила поинаква приказна.
Подоцна признал дека тој ја усмртил. Неговото објаснување било дека мајка му, која наводно имала психички проблеми, не го препознала и го нападнала, по што тој реагирал во самоодбрана. Одбраната тврдеше дека агресивното однесување било дополнително поттикнато од терапиите и лековите што ги примал поради здравствените нарушувања.
Случајот предизвикал огромно внимание во американската јавност. На судењето беа откриени детали за долгогодишната изолација на актерката, нејзините психолошки проблеми и мистериозните финансиски трансфери од Јордан. Тимоти на крајот бил осуден за убиство од небрежност и добил условна казна, одлука што предизвикала бројни контроверзии.
Тој починал во 2003 година од срцев удар, носејќи ја со себе една од најголемите мистерии на Холивуд – дали навистина бил син на кралот Хусеин.
Денес приказната за Сузан Кабот останува една од најморничавите холивудски судбини. Од девојче кое пораснало во сиромаштија, преку филмска ѕвезда и наводна љубовница на еден крал, до жена која последните години ги минала во осаменост и страв. Нејзиниот живот изгледа како сценарио за филм, но трагичниот крај потсетува дека зад гламурот на Холивуд често се кријат приказни многу потемни од сè што може да се види на филмското платно.
Н.Т