2024 година беше исклучително успешна за ELENA LUKA GROUP. Изминатата година целиот вложен труд, пасија и знаење кои компанијата ги поседува беа препознаени, вреднувани и наградени. Наградите како „Македонски квалитет“, „Лидерство за различности“ и „Жена на годината“ дадоа признание на напорната работа, упорноста и вредностите кои ЕЛЕНА ЛУКА ги негува во својот принцип на работа.
За тоа како сопственичката и генерална менаџерка на ELENA LUKA GROUP г-ѓа Елена Пандева (ЕЛЕНА ЛУКА) ја оценува годината која е зад нас, што за неа биле најголемите предизвици и достигнувања, но и за инспирацијата што ја движи нејзината креативна визија, прочитајте во ексклузивното интервју за насловната страна на јануарскиот број на Fashionel.
2024 година ја заокруживте како исклучително успешна година, која ви обезбеди инспиративен старт на новата која е пред нас. Како Вие ја доживеавте годината која измина и како лично ја оценувате?
-Изминатата година апсолутно ја одбележаа огромните успеси на ELENA LUKA GROUP. 2024-та беше динамична година на исклучителни можности, заедно со тоа и големи предизвици, но пред сè година на извонредни победи што ги надминаа стандардите и очекувањата. Лично ја оценувам како една од најпродуктивните, кога целиот вложен труд, пасија и знаење беа препознаени, вреднувани и наградени. Горда сум што заедно со мојот тим отворивме нови хоризонти во секој аспект на нашата работа и постигнавме одлични резултати во нашите клучни проекти. Секој предизвик го пречекав со решителност и желба да креирам нешто што ќе остави траен белег и сметам дека таа амбиција ја реализирав, а тоа секако подразбира уште поголема одговорност и можности за уште позначаен прогрес и во иднина. Но, она што ја прави исклучително посебна годината со која веќе се поздравивме, е тоа што нашето семејство со задоволни клиенти е уште побројно и што ELENA LUKA GROUP уште еднаш се потврди зошто е лидер на пазарот во секоја сфера на своето делување.
Кои беа моментите што во 2024 година најмногу ви оставија впечаток и дефинитивно ќе ги паметите?
-Листата со моментите што ја одбележаа 2024-та ме прави особено горда, затоа што тука се вклучени капитални проекти кои што не само што успешно ги реализирав заедно со мојот тим, туку беа и пошироко општествено признаени. Меѓу клучните проекти за ELENA LUKA HOME што отвори едно исклучително значајно поглавје во нашата работа, беше и официјалната промоција на премиум станбено-деловниот комплекс FUTURA кој што според највисоките стандарди се гради во општина Кисела Вода и токму на овој суштински проект ќе биде нашиот фокус во градежната компанија и во тековната година. ЕЛЕНА ЛУКА со сите бројни успешни проекти и уникатни колекции, го потврди својот статус на бренд-лидер во модната индустрија. Луксузните венчални колекции, авангардните свечени линии, како и актуелната LUXURY BROCADE, односно исклучително успешната брокатна колекција, се само еден дел од препознатливите модни деликатеси, покрај сите значајни соработки, презентации и модни ревии, што и дадода непроценлив моден печат на изминатата година и буквално модно ја одбележаа 2024-та. Најпознатиот и највлијателниот онлајн моден магазин FashioneEL powered by ELENA LUKA, доби нов уште посовремен лик и модерен редизајн на веб страната, со што започнува свое ново уште поуспешно поглавје во својот домен што ме прави навистина среќна. Се гордеам со постигнатото, но исто така со нетрпение очекувам да ви ги презентираме сите новитети што ви ги подготвуваме. Оваа година беше само почеток на новиот период на раст и иновации за нашиот тим и брендовите во семејството на ELENA LUKA GROUP.
Во текот на 2024 година добивте многу признанија за вашата работа. Што овие признанија значат за вас?
-Признанијата и наградите имаат огромно значење, лично за мене, но секако и за целиот посветен тим на ELENA LUKA GROUP. Верификацијата и препознавањето на љубовта, професионалниот пристап и трудот што го вложувам во работата, доаѓа и преку наградите што минатата година навистина беа и бројни и исклучително вредни. Наградите како „Македонски квалитет“, „Лидерство за различности“ и „Жена на годината“ се повеќе од обични признанија – тие се симбол на напорната работа, упорноста и вредностите што ги негувам во мојот принцип на работа. Наградата „Македонски квалитет“ која што ми ја додели почитуваната претседателка на државата, г-ѓа Гордана Силјановска Давкова, а во организација на Сојузот на стопански комори, е гордост за сите брендови од семејството на ELENA LUKA GROUP и потврда дека поставуваме високи стандарди за квалитет и иновација. Оваа награда е инспирација за да продолжиме да го предводиме пазарот поставувајќи ги критериумите за квалитет на највисоко ниво. Признанието „Лидерство за различности“ од „Ability Awards“ за мене е поттик и обврска да вложувам уште повеќе во промоцијата на инклузивноста, еднаквоста и различностите. Тоа е потсетник дека корпоративната култура која ја градиме треба да биде пример за општество во кое сите имаат еднакви можности за успех и напредок. Наградата „Жена на годината“ ја доживувам како признание не само лично за мене, туку и за сите жени кои се дел од успесите во сите сфери во кои што твориме. Тие се срцето на нашата работа, мотивацијата зад секој проект и инспирацијата за иднината што ја градиме заедно. Овие признанија ме потсетуваат на одговорноста да продолжам да работам со истата енергија, да создавам нови вредности и да инспирирам нови генерации. Тие не се само личен успех, туку и успех на мојот тим и на заедницата што ја поддржуваме. Нивната вредност е во тоа што ја зајакнуваат нашата мотивација и ја поттикнуваат нашата посветеност кон постојан раст и позитивно влијание.
Кој беше најголемиот предизвик за Вас како дизајнер и жена лидер во 2024 година?
-Предизвиците никогаш не ги гледам како проблем, туку напротив како можност за раст и да си докажеме себеси дека секогаш можеме подобро и дека нашиот успех нема лимит. Секој предизвик е потсетник дека со труд, посветеност и визија, можеме да ги надминеме дури и најкомплексните ситуации. Како лидер и визионер, предизвиците се дел од моето секојдневие, но нивното ефективно менаџирање е вештина што ја усовршувам со текот на времето и преку стекнато искуство. Она што го научив е дека секој предизвик е прилика да се издигнеме, да покажеме флексибилност и иновативност, и дека вистинскиот успех доаѓа кога тимот се обединува за да ја постигне заедничката цел. Оваа година беше пример за тоа како упорноста, визијата и вербата во себе и во другите можат да ги трансформираат предизвиците во успеси.
Премиум станбено-деловниот комплекс FUTURA е особено значаен капитален проект на ELENA LUK HOME. Колку сте задоволни од тоа како досега прифатен?
-FUTURA Complex е извонредно прифатен од јавноста, што претставува огромна сатисфакција за мене со оглед на капиталното значење на овој проект. Позитивните реакции на пазарот, соработниците и клиентите потврдуваат дека иновативниот пристап и нашата посветеност на квалитетот резултираат со успешен проект. Овој комплекс е симбол на современиот животен стил, и драго ми е што луѓето го препознаа како вредност. Визионерскиот проект FUTURA Complex е репрезент на најсовремената врвна архитектура која квалитетот на живот го става во фокус. Со површина од 47.000м2, овој ултра современ станбено-деловен комплекс се издвојува со својот иновативен и функционален дизајн, со концепт кој има за цел да изгради препознатлив, модерен и максимално квалитетен животен стил. Лоциран на одлична локација во општина Кисела Вода, на само неколку минути пешачење од центарот на Скопје, комплексот нуди уникатна комбинација на урбано живеење, комфор, безбедност и концепт на домување прилагоден според барањата на современиот човек. Со четири станбено-деловни објекти, 382 станбени единици, зелена оаза за рекреација и атрактивен деловен простор, FUTURA Complex ги обединува сите аспекти за квалитетно живеење. Ми претставува огромна чест и задоволство што ELENА LUKA HOME стои зад едно вакво капитално архитектонско дело.
Која колекција или проект можете да го издвоите како најдраг од изминатава година и зошто?
-Секој сегмент, секое уникатно парче и секоја колекција што се дизајнира во ЕЛЕНА ЛУКА е симбол на една бесконечна и безрезервна љубов кон работата и целиот креативен процес. Затоа секој дизајн потпишан од брендот зрачи со непроценлива убавина, а нашите клиенти кои што имаат високопрофилирно чувство за естетика, секогаш ја препознаваат вредноста и уметноста што ЕЛЕНА ЛУКА ја креира, а тоа за мене е најголемата сатисфакција. Есенцијата е во храброста да се биде различен и во константното надминување на границите на очекуваното. ЕЛЕНА ЛУКА е синоним за авангарда, луксуз, уникатност и индивидуалност, затоа што секој дизајн има карактер и изразува став. Суштината на ЕЛЕНА ЛУКА е пред сè во тоа што е моја лична огромна љубов и персоналниот печат што го оставам во секој сегмент од неговата работа, го прави незаменлив.
Што изминатата година беше најголема инспирација во вашето работење?
-Најголема инспирација во моето работење изминатата година беа добрите резултати и задоволството на нашите клиенти и заедницата. Секој проект кој ја исполнува визијата на клиентите и создава насмевки е доказ дека напорната работа и посветеноста навистина прават разлика.
Во ЕЛЕНА ЛУКА, тоа се моментите кога креациите ја надминуваат очекуваната убавина и стануваат дел од важните моменти во животот на нашите клиенти. Нивната среќа и гордоста со која ги носат нашите дизајни ме инспирираат да креирам уште поиновативни и уникатни решенија.
Во ELENA LUKA HOME, задоволството на луѓето кои ги гледаат своите соништа преточени во нивниот дом е непроценливо. Реакциите на клиентите кога ќе видат како нивната визија оживува во просторот се најголемата потврда дека секој детаљ и секоја идеја вредат.
Задоволството и поддршката од клиентите и заедницата се столбот на нашата инспирација и основата врз која ја градиме иднината на нашиот бренд. Тие ни даваат мотивација да растеме, да учиме и да ги поставуваме уште повисоки стандарди.
Се истакнувате по Вашата поддршка на жените претприемачи. Како ги охрабрувате жените да веруваат во својот потенцијал?
-Ги охрабрувам преку личен пример, покажувајќи дека секоја идеја може да стане реалност со доволно упорност и посветеност. Преку различните иницијативи во ELENA LUKA GROUP и преку нашата фондација, организираме обуки, менторства и настани за вмрежување, каде жените можат да ги развијат своите идеи и да добијат поддршка. Секогаш потенцирам дека амбицијата и креативноста не треба да имаат граници. Вистинскиот момент да започнете свој бизнис е сега! Нема потреба да се одложуваат соништата и потребите за да се изразите себеси. Нема никогаш да се создадат 100% поволни услови за реализација на некој невообичаен или вонсериски сон, затоа што во почетокот кога имаме некоја уникатна идеја таа е тешко прифатлива. Немојте да се плашите од амбицијата. Жените кои се амбициозни може да бидат и одлични лидери и одлични мајки и сопруги и тој концепт апсолутно функционира. Не е битно само колку ќе заработите, туку колку личен придонес ќе оставите врз квалитетот на животот на другите околу вас. Затоа што заедницата треба да има позитивна клима во која сите квалитетно ќе делуваме. Женското вмрежување е многу важно и успехот на една жена треба да биде мотивација за другите жени. Да бидеш жена значи да имаш моќ и да имаш сила и капацитет со кој ова општество може да го направиш многу подобро. Самодоверба, упорност, уникатна идеја и перманентно работење.
Во која насока ќе се движат Вашите брендови во 2025 година?
-Во следниот период, фокусот ќе биде на интеграција на иновациите во сите процеси на функционирање. Целта е да изградиме иднина што не само што ќе ги исполнува потребите, туку ќе ги надминува очекувањата. Во секој сегмент од мојата работа, заедно со мојот тим, насочени сме кон создавање на вредности што инспирираат и стануваат безвременски. ЕЛЕНА ЛУКА ХОУМ интензивно работи на градење квалитетен, урбан и светски животен стил во домувањето. ЕЛЕНА ЛУКА ја продолжува својата мисија да ги прави жените среќни и самоуверени со една перфектна модна уметност во која имам вложено сериозен дел од себе. Како резултат на оваа посветеност и професионалност, успехот е природен исход во мојата работа.
Која е Вашата порака до оние кои сакаат да го остварат својот сон во модата или бизнисот?
-Верувајте во себе и во вашата идеја, бидејќи соништата не можат да чекаат. Работете упорно, вложувајте во своето знаење и не се плашете да ги надминувате границите. Секој успех започнува со храброста да се направи првиот чекор.
Што би сте си посакале Вие во новата 2025 година, а што би посакале на вашите соработници, клиенти и наши читатели?
-Си посакувам здравје и енергија за да продолжам да ја остварувам мојата визија за позитивен импакт во секоја сфера во која што работам. На моите соработници, клиенти, на мојот тим и на сите прекрасни луѓе им посакувам многу успеси, инспирација и радост. Нека 2025 година биде исполнета со нови можности, искрени партнерства и заеднички триумфи!
Macedonian 
English