По четиринаесет години на чело на една од најпознатите француски модни куќи, Оливие Рустен ја напушта позицијата креативен директор на Балман.
Веста што денес беше потврдена го означува крајот на една исклучително влијателна ера во современата мода – период во кој Балман од класичен париски бренд прерасна во глобален симбол на дигитален луксуз и културен идентитет.
Кога во 2011 година, на само 25 години, Рустен го презеде Балман, модната сцена го пречека со недоверба. Неговата визија ги спои двете, дотогаш одвоени сфери – традиционалната висока мода (haute couture) и светот на дигиталната видливост.
Колекциите беа визуелно раскошни, сценски режирани и создадени со цел да станат вирални. Наместо затворени презентации, Балман ја отвори комуникацијата со публиката – директно, без посредници, преку социјалните мрежи.
Неговиот тим на модели, познат како Balmain Army, обедини светски ѕвезди и инфлуенсери, создавајќи нов вид заедница што ја претвори модната куќа во културен феномен.
Како посвоено дете со потекло од Етиопија и Сомалија, тој секогаш бил свесен колку долго различноста во високата мода била маргинализирана.
Неговото заминување не делува како ненадејна одлука, туку како логичен чекор во кариерата на човек кој научил како да ги менува правилата, но и кога треба да се оддалечи од нив.
Photo: Instagram
English 
Macedonian