Во Битолскиот народен театар на 28ми мај ќе се одржи модниот перформанс КРЕАТИВЕН ДЕН 2025. На настанот којшто се одржува по четврти пат ќе учествуваат седум средни училишта, девет градови и 15 независни модни дизајнери.
КРЕАТИВЕН ДЕН е мост помеѓу образованието и бизнис секторот, а целта е подобрување на имиџот и враќање на довербата на модно-текстилната струка помеѓу младиот креативен потенцијал.
Секоја година се изработуваат креации на претходно зададена тема од професорките на СОУ “Таки Даскало“ од Битола, а оваа година темата е Ориент.
Средношколците работат во тим составен од дизајнер-ментор и модел (Дама, успешна жена, која ја презентира креацијата).
Ученикот има можност да работи со професионален дизајнер,кој го води низ целиот процес на изработка, а Дамата со носењето на креацијата, јавно му го признава стекнатото знаење и вештини на ученикот.
Целиот концепт има висока општествено одговорна и хумана карактерна црта, затоа што, истата таа креација Дамата си ја купува, а средствата како донација се наменети за подобрување на практичната работа во училишните кабинети.
Сите тимови работат на модели кои се инспирирани од ориентот- богатото културно наследство, декоративните елементи , традиционалните ткаени и колоритни мотиви од истокот. Покрај организацијата на модната ревија ќе има и средби и разговори околу дизајнирањето на облека со познати дизајнери од Македонија.
Со ова младите се поттикнуваат на претприемништво, на стручно образование, коешто брзо ги носи до финансиско и кариерно осамостојување.
ВИП гости на модниот настан ќе бидат: ЕЛЕНА ЛУКА, Никола Ефтимов, Ивана Кнез, Татјана Алексиќ и претставници од Текстилен Кластер.
Macedonian 
English