Македонскиот филм „Диџеј Ахмет“ на Георги Унковски, доживеа голем успех преку светската премиера на престижниот филмски фестивал „Санденс“, каде што ја освои специјалната награда на жирито за креативна визија и наградата од публиката.
Филмот веќе е продаден во Канада, Австралија, Нов Зеланд, Белгија, Луксембург, Холандија, Португалија, Шпанија, Израел и во цела поранешна Југославија, објави „Варајати“, дополнувајќи дека се во тек преговори и за други територии.
„Диџеј Ахмет“ е драма во која станува збор за 15-годишно момче од јуручко село во Источна Македонија, кое наоѓа прибежиште во музиката и сонува да стане диџеј додека се справува со очекувањата на татко му, конзервативната заедница и неговото прво искуство со љубовта – девојка која веќе му е ветена на некој друг.
Филмот е копродукција помеѓу „Синема футура“ и „Сектор филм“ од Македонија, „Алтер вижн“ и „Аналог вижн“ од Чешка, „Бекрум продукција“ и „Баш Челик“ од Србија. Продуценти на филмот се Иван Унковски и Ивана Шекуткоска.
Филмот е поддржан од Агенцијата за филм.
Macedonian 
English