Pantone ja објави со нетрпение очекуванaта годишнa „боја на годината“ за 2026, избирајќи „воздушесто, избалансирано бело“ наречено Cloud Dancer.
„Глобалниот авторитет за боја“ тврди дека PANTONE 11-4201 Cloud Dancer има „аерирана присутност“ која „делува како шепот на смиреност и мир во бучниот свет“.
Ова е прв пат Pantone да избере бела боја откако започна да ја прогласува бојата на годината во 1999 година.
Боја на годината ја избира тим од експерти и е наменета да „вниманието го насочи кон врската меѓу културата и бојата“, вели компанијата.
Оваа година изборот треба да ја претставува спокојноста и смиреноста, кои според Pantone се особено потребни „во едно забрзано општество“.
„Слично на празно платно, Cloud Dancer ја означува нашата желба за нов почеток. Отфрлајќи слоеви застарено размислување, ја отвораме вратата за нови пристапи,“ соопшти Pantone во својата најава.
Пробна нијанса на Pantone Cloud Dancer.
„Во време на трансформација, кога повторно ја замислуваме нашата иднина и нашето место во светот, Pantone 11-4201 Cloud Dancer е дискретна нијанса што нуди ветување за јасност,“ рече Леатрис Ајземен, извршна директорка на Pantone Color Institute, во соопштение за медиумите.
„Какофонијата што нè опкружува станува совладувачка, правејќи ни потешко да ги чуеме гласовите на нашето внатрешно јас. Како свесна изјава за поедноставување, Cloud Dancer ја засилува нашата концентрација, ослободувајќи нè од одвлекување на вниманието од надворешните влијанија.“
Pantone е глобална компанија за стандардизација на бои, а изборот на боја на годината го прави Pantone Color Institute — тим од истражувачи на бои кои нудат консултантски услуги и прогнозираат трендови на пазарот.
За да се избере бојата, глобален тим ги разгледува новите технологии, општествените вредности, уметничките збирки, патувачките дестинации и го проценува расположението и чувствата што ги имаат дизајнерите и потрошувачите во текот на годината.
„Постојат причини зошто луѓето гравитираат кон одредени семејства на бои во одредени периоди. За нас сè се сведува на препознавање на семејството бои што го гледаме како се пробива низ сите области на дизајнот, а потоа од таму го издвојуваме точно оној тон што го забележуваме,“ изјави минатата година за TIME Лори Пресман, потпретседателка на Pantone Color Institute. „Често го споредувам нашиот тим со антрополози — но за боја.“
Ова не е првпат Pantone да се потруди да го смири светот со својот избор на боја на годината. Mocha Mousse беше избрана во 2025 заради својата топлина и хармонија, а Peach Fuzz во 2024 исто така беше опишана како нежна и негувателна нијанса.
Cloud Dancer може да биде првата бела боја избрана како боја на годината, но Pantone се доближи до тоа во 2006 година со неутралната Sand Dollar, за која се тврдеше дека е избрана поради загриженоста за економијата.
Бојава е особено симболична бидејќи изминатите дванаесет месеци во САД беа обележани со големи превирања. Атентатот врз десничарскиот коментатор Чарли Кирк ја потресе земјата, наспроти порастот на политичко насилство кон јавни личности, вклучително и пукањата врз двајца пратеници од Минесота и нивните сопружници, како и други напади. Нестабилноста продолжи и во 2025 година со масовни протести и последното пукање на двајца припадници на Националната гарда — едниот убиен, другиот тешко повреден.
Според Pantone, Cloud Dancer нè потсетува на потребата од човечка поврзаност и меѓусебно разбирање. Белата боја исто така ја претставува можноста за чист лист — нов почеток на кој може повторно да се изгради нешто.
Н.Т