Свадбената мода отсекогаш била симбол на традиција, романтика и нежност, но во последните години сè повеќе невести го напуштаат класичниот „принцеза“ изглед и се свртуваат кон нешто подраматично, помистично и многу похрабро готската (goth) естетиката.
Овој тренд, кој станува сè поактуелен, носи сосема нова енергија во светот на свадбите и покажува дека љубовта не мора секогаш да биде облечена во бело.
Goth невестата не е мрачна, таа е моќна, мистична и самоуверена. Наместо класични бели фустани со тантела, сè почесто се гледаат венчаници во црна, темно бордо, темно виолетова или длабока шампањ нијанса. Материјалите се богати и драматични, па така гледаме кадифе, тешка свила, слоеви тул, чипка со барокни мотиви…
Црниот венчален фустан, кој некогаш беше шокантен избор, денес станува симбол на индивидуалност. Тој не ја негира романтиката туку ја прави подлабока, поинтензивна и визуелно впечатлива.
Свадбите со готска тематика се посебно доживување. Амбиентот тука игра огромна улога и наместо пастелни цветови и светли сали, се избираат темни цветни аранжмани (бордо рози, темни божури, црни калии), свеќи и пригушено осветлување, антички детали и винтиџ елементи, темни чаршафи, златни или бронзени акценти.
Целта е да се создаде чувство на бајка, но не класична, туку „dark romance“ приказна.
Зошто овој тренд станува толку популарен? Затоа што современите невести сè повеќе ја ставаат личноста пред традицијата. Наместо да изберат „што треба“, тие избираат „што ги претставува“. Готскиот стил дозволува слобода, креативност и силна емоција.
Темната романтика добива популарност и преку познатите личности, кои сè почесто избираат неконвенционални свадби, интимни церемонии и мистична естетика. Наместо класичен гламур, тие покажуваат дека свадбата може да биде лична, уметничка и поинаква.
Еден таков пример е актерката Ања Тејлор‑Џој која што имаше тајна свадба со готски елементи.
Суштината на овој тренд не е само во темните бои. Современите невести сè помалку се водат од тоа „што е модерно“, а сè повеќе од тоа како се чувствуваат. Наместо да следат правила, тие избираат стил што ја изразува нивната личност, силен, мистичен, романтичен и неконвенционален.
Gothic bridal трендот покажува дека свадбената мода влегува во нова ера каде индивидуалноста, драмата и емоцијата се поважни од традицијата. Тоа е љубов што не се плаши да биде поинаква.