Постојат моменти кога модата не е само визуелен израз, туку јасна дефиниција. Кога силуетата зборува погласно од зборовите, а бојата ја носи целата емоција. Токму таков момент е новата насловна страна на FASHIONEL – чиста, концентрирана и прецизна.
Фустанот на ELENA LUKA, прилепен за телото како втора кожа, ја следи женската форма со дисциплина и елеганција. Нагласените раменици внесуваат архитектонска строгост, создавајќи баланс меѓу моќта и сензуалноста. Нема вишок. Нема случајност. Сè е поставено со јасна намера, да се истакне жената која знае што носи и зошто го носи.
Црвената боја тука не е симбол, туку алатка. Таа не бара внимание, таа го презема. Длабока, богата и светкава, таа асоцира на зрелост, интензитет и самодоверба. Како вкус што се задржува, како текстура што се памети. Црвената на ELENA LUKA не е импулсивна, таа е контролирана, прецизна и луксузна.
Гламурот е присутен, но питом. Без агресија, без театар. Светкавата површина на фустанот ја фаќа светлината со мера, додека кројот останува строг и јасен. Тоа е гламур за жена која не мора да докажува ништо, таа веќе е таму.
Сценографијата дополнително ја засилува пораката: повторувањето на формата, ритамот на силуетите, симетријата што создава чувство на ред и контрола. Жената во центарот не е дел од масата, таа е фокусот. Таа чекори напред, сигурно и мирно, во фустан кој не ја носи неа, туку таа го носи него.
Оваа насловна не зборува за момент, туку за став. За женственост која не е нежна по дефиниција, туку силна по избор. За елеганција без пардон. За мода што не флертува со трендови, туку создава идентитет.
Затоа, ова не е само фустан. Ова е порака.
И таа порака е јасна: Моќта има боја. Љубовта има боја, виното има боја…
Небојша Толески