Постојат многу модни приказни за успех, но малку од нив се толку драматични, инспиративни и речиси неверојатни како животната приказна на Наталија Водјановас.
Денес таа е една од најпознатите супермодели на својата генерација, филантроп, претприемач и сопруга на човек кој е дел од најмоќната династија во луксузната индустрија. Но патот до таа позиција бил исполнет со сиромаштија, жртви, болка и борба за опстанок.
Во последните денови светските медиуми пишуваат за уште една голема вест од нејзиниот живот, на 44-годишна возраст Наталија објави дека го очекува своето шесто дете. Веста ја потврди преку насловна страница на француското издание на Vogue, позирајќи во краток фустан кој гордо го истакнува нејзиниот труднички стомак.
View this post on Instagram
За многумина тоа беше уште еден доказ дека Водјанова одамна ги надминала класичните правила за возраста во модната индустрија.
Но зад гламурот на денешната Наталија се крие една од најтешките животни приказни што некогаш ги создала модната сцена.
Родена е во 1982 година во Горки, денешен Нижни Новгород во Русија. Нејзиното детство било далеку од раскошот што денес ја опкружува. Мајка ѝ сама се грижела за семејството, а Наталија уште како девојче помагала продавајќи овошје на улица за да обезбеди средства за преживување. Ситуацијата дополнително ја отежнувала здравствената состојба на нејзината сестра Оксана, која има аутизам и церебрална парализа.
Во бројни интервјуа Водјанова подоцна ќе признае дека токму сиромаштијата ја научила на дисциплина, издржливост и чувство за одговорност. Наместо безгрижно детство, таа имала работни денови исполнети со грижа како семејството да преживее до следниот месец.
Судбината почнала да се менува кога имала само 16 години. Локален моден агент ја забележал нејзината необична убавина, комбинација од нежно лице, светли очи и природна елеганција која подоцна ќе стане нејзин заштитен знак. Наскоро добила можност да замине во Париз, градот кој засекогаш ќе ѝ го промени животот.
Она што следувало е речиси бајка. За кратко време Наталија станала една од најбараните манекенки во светот. Работела за најголемите модни куќи и фотографи на своето време. Била лице на кампањи за Gucci, Calvin Klein, Louis Vuitton, Guerlain и Stella McCartney. Позирала за насловните страници на највлијателните модни списанија, меѓу кои и Vogue, а многу критичари ја нарекуваа „новата руска Пепелашка“.
Нејзиниот успех бил толку голем што во текот на 2000-тите години стана една од најплатените манекенки во светот. Модните аналитичари често истакнуваа дека Водјанова поседува ретка способност истовремено да изгледа аристократски и пристапно, што ја правеше идеална и за висока мода и за комерцијални кампањи.
Но приватниот живот не бил секогаш толку совршен.
Во 2001 година се омажи за британскиот аристократ Џастин Портман. Бракот изгледаше како уште едно поглавје од модерна бајка. Двојката доби три деца и долго време важеше за едно од најелегантните семејства во европскиот џет-сет. Сепак, зад затворени врати односот почнал да се распаѓа и во 2011 година следуваше развод.
Токму тогаш во нејзиниот живот влегува човекот кој ќе стане нејзин најголем животен партнер, Антоан Арно.
Нивната приказна започнала за време на модно снимање. Антоан не е само успешен бизнисмен. Тој е син на Бернар Арно, човекот кој стои зад луксузниот конгломерат LVMH и кој со години се смета за еден од најбогатите луѓе на планетата.
ЛВМХ ги поседува брендовите Dior, Louis Vuitton, Tiffany & Co., Sephora, Moët & Chandon и десетици други симболи на глобалниот луксуз.
Многумина гледаа на нивната врска како на спој на две модерни династии, една изградена преку модата и друга преку бизнисот. Но и двајцата постојано нагласуваат дека нивната љубов започнала далеку од светлата на јавноста.
„Кога ја видов првпат, буквално ми застана здивот“, изјави еднаш Антоан Арно. „Не беше само убавината. Имаше нешто магнетично во неа.“
Денес тие имаат две деца заедно, а со новата бременост нивното семејство ќе стане уште поголемо.
Покрај модата, Наталија остави силен белег и во хуманитарната работа. Инспирирана од животот на својата сестра, таа ја основа фондацијата Naked Heart Foundation, која помага на деца со посебни потреби и на нивните семејства. За многумина токму ова е нејзиното најголемо животно достигнување.
Нејзиниот моден стил, пак, останува пример за тивок луксуз и природна елеганција. Наместо агресивен гламур, Водјанова секогаш избира префинети силуети, беспрекорен крој и дискретен луксуз. Во време кога многу славни личности се обидуваат да привлечат внимание со екстраваганција, таа останува верна на суптилноста. Затоа често ја споредуваат со европските аристократки и со легендарните модели од деведесеттите.
Од девојче кое продавало овошје на улица за да преживее, до жена која денес е дел од најбогатото луксузно семејство во светот, Наталија Водјанова ја живее една од најфасцинантните трансформации во современата модна историја. Нејзината приказна не е само приказна за убавина и успех, туку и за упорност, храброст и способност човек никогаш да не ги заборави сопствените корени, без разлика колку високо ќе стигне.
Н.Т