Теракота кафеава - есенската нијансата што го освојува ентериерот

Бежовата долго време беше сигурен избор за дневната соба. Светла, мирна и лесна за комбинирање, таа создаваше уреден и безвременски простор.

Но, оваа есен вниманието се насочува кон нешто посмело.

Станува збор за длабоката теракота кафеава нијанса, земјена, топла и богата боја која на ентериерот му дава сосема поинаков карактер.

Подлабоко и пософистицирано

Теракота кафеавата се наоѓа некаде помеѓу класичната кафеава и топлите земјени тонови. Има доволно интензитет за да се забележи, но истовремено останува природна и пријатна. Токму затоа добро функционира во дневни соби каде што сакаме топлина без просторoт да изгледа преоптоварено.

Не мора да го менувате целиот мебел

Убавината на оваа боја е што можете да ја внесете постепено. Перници, прекривка, тепих, завеси или една впечатлива фотелја се доволни за дневната соба да добие нов изглед. Ако сакате поголема промена, теракота кафеавата може да се употреби и на еден ѕид.

Со кои бои најубаво се комбинира?

За смирен и елегантен изглед, комбинирајте ја со крем, слонова коска, песочна и светлобежова. За посовремен ентериер, одлично функционираат црна, темно кафеава и графитна. А ако сакате природна атмосфера, додадете светло дрво, лен, ратан и камен. Токму природните материјали ја нагласуваат земјената карактеристика на теракотата.

Теракота кафеавата е богата нијанса и затоа треба да се земе предвид природната светлина во просторијата. Во светла дневна соба може да изгледа топло и луксузно, додека во простор со малку дневна светлина премногу темни теракота тонови можат визуелно да го затемнат ентериерот. Затоа, ако просторот е потемен, подобро е бојата да се внесе преку мебел и детали, наместо преку големи површини.