Кога минимализмот станува провокативен

Роузи Хантингтон-Вајтли уште еднаш покажа дека е доволно едно добро избрано модно парче за да привлече внимание на црвениот тепих.

 Британската манекенка се појави на 15-тата годишна гала-вечер LACMA Art+Film Gala во Лос Анџелес, во креација на модната куќа Гучи која на прв поглед изгледаше минималистички и елегантно, но имаше неочекувано изненадување.

Нејзиниот долг црн фустан имаше долги ракави, тесна силуета и впечатлива, скулптурална јака со високо поставен врат. Предниот дел беше целосно затворен, без непотребни украси и детали што би го одвлекувале вниманието. Но, кога Роузи се сврте кон фотографите, стана јасно дека станува збор за многу посмел моден избор.

Задниот дел на фустанот беше речиси целосно отворен, со длабок изрез кој се спушташе до долниот дел на грбот. Отворениот крој беше дополнет со мал метален детаљ со препознатливиот знак на „Гучи“, кој ги поврзуваше деловите на креацијата. Високиот шлиц на здолништето дополнително ја нагласуваше силуетата и ѝ даваше драматичност на целата комбинација.

Особено интересен беше контрастот меѓу црната надворешност и темнозелената светкава внатрешност на фустанот, која суптилно доаѓаше до израз при движењето. 

Роузи се појави на гала-вечерта LACMA Art+Film Gala, традиционален настан што се одржува во Музејот на уметноста на округот Лос Анџелес. Овогодинешното издание им оддаде почит на уметницата Вија Целминс и режисерот Денис Вилнев, а меѓу гостите беа бројни имиња од светот на филмот, музиката и модата. 

Со овој избор, манекенката покажа дека црната боја и класичната силуета не мора да значат предвидлив изглед. Понекогаш токму еден неочекуван крој е доволен едноставната креација да стане главна тема на модната вечер. Овојпат, Роузи успеа да спои префинетост и провокација без да ја изгуби елеганцијата по која е препознатлива.