Модниот трик на познатите: Како да комбинирате широко со тесно

Еден од наједноставните начини облеката да изгледа складно е да се создаде контраст меѓу широки и потесни парчиња.

Широките панталони, на пример, можат одлично да се комбинираат со топ, маица или џемпер кој поблиску ја следи линијата на телото. Така се создава визуелна рамнотежа без комбинацијата да изгледа премногу обемно.

Оваа формула одамна е омилена и кај познатите. Џиџи Хадид честопати носи широки панталони со краток или потесен горен дел, токму за да се балансира волуменот на долниот дел. 

И Зендаја неретко ја гледаме во токму ваква комбинација -прилепен топ вовлечен во драматично широки панталони. Одличен пример како различните пропорции можат да создадат интересна силуета.

Посебно добро функционираат панталоните со висок струк, бидејќи можат визуелно да ја нагласат половината и да создадат подолга линија на нозете. Потесен топ вовлечен во панталоните или пократок џемпер дополнително го нагласува преминот меѓу горниот и долниот дел.

Но, „тесно“ не значи дека мора да биде целосно прилепено. Полупритегнат џемпер, пократка кошула или маица која е само делумно вовлечена во панталоните можат да создадат сличен ефект. Ова е одлична варијанта за секојдневен стил, бидејќи комбинацијата останува удобна, но изгледа внимателно осмислена.

Правилото може да се примени и во обратна насока. Ако блејзерот, кошулата или џемперот се пошироки, долниот дел може да биде потесен или со права линија. Така широкото парче станува главниот акцент, додека долниот дел ја задржува јасната форма на силуетата.

Овој принцип одлично функционира и со фармерки. Широките фармерки можат да се носат со едноставна маица или боди, а доколку сакате пософистициран изглед, истата комбинација може да се надополни со блејзер или долг капут. Контрастот меѓу лежерниот долен дел и поконкретниот горен дел ја прави комбинацијата поуредна.

Не мора ни боите да бидат комплицирани. Црн топ со широки беж панталони, бела маица со широки темни фармерки или еднобоен џемпер со широки панталони се доволни за да се постигне ефектот. Кога кроевите се интересни, нема потреба комбинацијата да биде преоптоварена со многу бои и детали.

Истиот принцип може да се користи и при слоевито облекување. На пример, тесен топ под поширок блејзер со широки панталони создава повеќе слоеви, но тесниот средишен дел ја задржува формата на комбинацијата. Ваквото комбинирање на различни волумени е особено практично кога времето станува посвежо.

Најдобро од сè е што за овој ефект не ви е потребна нова гардероба. Доволни се еден пар широки панталони или фармерки и неколку поконкретни горни парчиња што веќе ги имате. Истото важи и обратно, широк блејзер или кошула може да добие сосема нов изглед кога ќе се спои со потесен долен дел.