Не се гости, туку персонал: Луѓето што работат во овие хотели изгледаат како да пристигнале на црвен тепих

Започнува со човекот кој ве пречекува.

И токму затоа денес најелитните хотели прават нешто што до неодамна изгледаше незамисливо- го претвораат персоналот во модна сцена.

Во влезовите на петѕвездени хотели, рецепционерите, консиержите, батлерите и келнерите понекогаш изгледаат како да се гости пристигнати на луксузна вечера, а не вработени кои започнуваат работен ден.

Совршено скроени костуми, свила, кадифе, рачно изработени детали, капи, марами и силуети инспирирани од висока мода – хотелската униформа влегува во нова ера.

Од работна облека до „haute couture“ за гостопримство

Долго време хотелските униформи беа функционални: бела кошула, црни панталони, сако и дискретно лого. Но, луксузната индустрија сфатила нешто важно, а тоа е дека гостите не купуваат само соба. Тие купуваат чувство.

А персоналот е дел од тоа чувство. Затоа денес хотелите бараат униформата да ја раскажува нивната приказна, дали хотелот е британски аристократски, модерен и минималистички, инспириран од локалната култура или ултралуксузен како приватен клуб.

Униформата станува исто важна како ентериерот, мирисот во лобито или дизајнот на мебелот.

Кога модни дизајнери ги облекуваат хотелите

Еден од најпознатите имиња во оваа област е британскиот дизајнер Николас Оуквел , основач на ателјето NO Uniform, кое создава специјално дизајнирани униформи за луксузни хотели.

Неговите креации се далеку од класичната претстава за униформа. Тој создава костуми инспирирани од британското кројачко наследство, модерни силуети, луксузни материјали, облека што изгледа како дел од модна колекција.

Неговото студио работело со познати хотелски брендови и им помага на хотелите да создадат визуелен идентитет преку облеката на персоналот.

Waldorf Astoria: кога персоналот добива модна колекција

Еден од најинтересните примери е легендарниот Waldorf Astoria New York, каде новите униформи за персоналот се создадени во соработка со NO Uniform.

Наместо класичен хотелски изглед, персоналот доби гардероба со моден карактер – кроеви, бои и детали што треба да ја одразат историјата и престижот на брендот.

Идејата била едноставна: персоналот да не биде само „невидлива услуга“, туку дел од целото луксузно искуство.

Rosewood London: персонал како британска аристократија

Во лондонскиот луксузен хотел Rosewood London, униформите се инспирирани од британската традиција.

Костумите со твид, волнени материјали и класични детали потсетуваат на англиските клубови и аристократски имоти.

Целта не е само елеганција.

Целта е гостите веднаш да почувствуваат дека влегуваат во свет со историја.

Sofitel и француската елеганција

Францускиот хотелски бренд Sofitel отиде чекор понатаму и ангажираше дизајнерката Корделија де Кастелан, позната по работата со Dior Maison, за нова глобална колекција униформи.

Колекцијата е замислена како гардероба за илјадници вработени низ светот, со идеја да ја пренесе француската елеганција во секој хотел.

Најинтересниот феномен: гостите и персоналот се визуелно поблиску

Порано униформата имала една задача, да покаже кој работи во хотелот. Денес нејзината улога е многу поширока. Во најлуксузните хотели, границата меѓу персоналот и гостите визуелно станува сè потенка.

Некој што стои зад рецепција може да изгледа како да оди на приватна вечера во Париз. Консиерж може да изгледа како член на старо европско аристократско семејство. Батлер може да има изглед на моден уредник.

Тоа е намерно.

Луксузот денес не е само она што го гледате во собата. Луксузот е целата сцена.

Зошто ова е иднината на хотелскиот луксуз?

Во свет каде секој хотел може да има мермер, златни детали и спектакуларен поглед, вистинската разлика станува – луѓето. А луѓето се првото нешто што гостите го паметат. Затоа униформата повеќе не е само облека.

Таа е бренд, приказна, култура и тивка форма на мода. Можеби најголемата промена во хотелскиот свет е токму дека  следниот пат кога ќе влезете во најлуксузниот хотел во светот, најдобро облечената личност во просторот можеби нема да биде гостин.

Можеби ќе биде човекот кој ве поздравува на влезот.