Отворени полици во кујната: Да или не?

Отворените полици во кујната изгледаат прекрасно на фотографиите, дрво, керамички чинии, убави чаши, неколку книги и зелено растение. Но, дали навистина се практични за секојдневно живеење?

Сè зависи од тоа каде ќе ги поставите, што ќе чувате на нив и колку сте подготвени да ги одржувате уредни.

Зошто ги сакаме?

Една од најголемите предности на отворените полици е што визуелно ја олеснуваат кујната. За разлика од горните елементи со масивни вратички, полиците оставаат поголем дел од ѕидот видлив и можат да направат просторот да изгледа посветол и поотворен.

Ова особено добро функционира во помали кујни. Наместо цел ѕид да биде покриен со високи шкафови, неколку дрвени полици внесуваат повеќе воздух и топлина во просторот.

Другата предност е практичноста. Чиниите, чашите или шолјите што ги користите секојдневно се веднаш пред вас – без отворање вратички и пребарување низ шкафовите.

Она што е предност во исто време може да биде и најголем недостаток. Сè што стои на отворената полица е постојано видливо. 

Отворените полици бараат повеќе одржување од затворените шкафови. На нив се таложат прашина, честички од готвењето и маснотии, особено ако се поставени блиску до шпоретот. Затоа предметите што стојат на нив треба редовно да се пребришуваат.

Како да решиме? 

Ако ви се допаѓа изгледот на отворените полици, не мора да ги замените сите горни шкафови. Во затворените елементи ставете ги работите што не сакате да бидат постојано видливи, а една или две отворени полици нека служат за најубавите и најчесто користените предмети.

На пример, на отворена полица можете да поставите: убави керамички чинии, шолји и чаши, дрвени даски, неколку тегли со суви намирници, мала саксија со билка...

Не е потребно полицата да биде празна, но не треба ниту секој сантиметар да биде исполнет. Добар трик е да комбинирате предмети со различна висина. На пример, до ниска чинија поставете повисока вазна или штица, а до неа неколку наредени шолји.

Наместо сите предмети да бидат наредени во една права линија, создадете мали групи.

Ако сакате кујната да изгледа топло, но современо, дрвените полици со бели или крем предмети се особено ефектни. Дрвото внесува природна топлина, додека белата и крем нијансите создаваат визуелна чистота. Неколку зелени растенија или билки можат да додадат уште еден природен слој без просторот да стане премногу шарен.

Каде не треба да стојат

Отворена полица директно над шпоретот можеби изгледа одлично на фотографија, но во секојдневната кујна може да биде прилично непрактична.

Колку е поблиску до местото каде што се готви, толку поголема е веројатноста предметите да бидат изложени на маснотии и испарувања. Затоа, ако сакате отворени полици, подобро е да ги поставите на место каде што нема директно да трпат од готвењето.

А што ако имате мала кујна...

Токму во мала кујна отворените полици можат да бидат многу корисни. Наместо дополнителен масивен шкаф, неколку полици можат да понудат простор за чинии, чаши, тегли и зачини, а притоа ѕидот да остане визуелно полесен.

Добро решение се и плитки полици, особено на тесен ѕид или неискористен агол. Со стаклени тегли, дрвени даски и неколку внимателно одбрани предмети, дури и малата кујна може да добие карактер.