Професионалните дизајнери објаснуваат како винтиџ елементите повторно влегуваат во современите ентериери

Дизајнерите повторно гледаат кон минатото за инспирација. Од тапети со впечатливи дезени, топли дрвени тонови и винтиџ текстили, ретро елементите повторно наоѓаат место во модерните домови, бидејќи сопствениците сакаат просторите да изгледаат полични, потопли и да имаат приказна.

„Класичната куќа на баба често се поврзува со шарена и пријатна естетика, со дезенирани завеси и еклектичен декор“, вели Миранда Калeн, главна дизајнерка и основачка на Inside Stories.

Тајната за успешно внесување на овие трендови е во мешањето на старото и новото.

На пример, поставување рустични дрвени рамки за фотографии или антички огледала во просторија со современ мебел може да создаде визуелно интересен и живописен ентериер.

Ако имате среќа да поседувате кутии со предмети наследени од бабите и дедовците, тие можат да бидат совршена почетна точка за пронаоѓање винтиџ уметнички дела, стари ткаенини или стаклени предмети.

Експертите препорачуваат пребарување на уникатни ретро парчиња и во антикварници и продавници за половна стока.

Топли дрвени тонови – враќање на природната елеганција

Дрвото повторно станува еден од најпосакуваните материјали во ентериерниот дизајн.

Дабови трпезариски маси, библиотеки со темни премази и рустични дрвени рамки за фотографии повторно се популарни, а трендот е лесен за примена благодарение на зголемената достапност на антикварни предмети.

„Со својата природна топлина и текстура, дрвото додава длабочина и карактер на секој простор“, вели Калeн.

Дизајнерите забележуваат дека дрвото повторно се користи на типично ретро начини, како на пример со вертикални декоративни панели (reeded finishes), кои додаваат текстура и луксузен изглед.

Тапети со дезени – крај на ерата на белите ѕидови

По периодот кога минимализмот и целосно белите ентериери доминираа во домовите, тапетите со богати дезени повторно се враќаат.

„Клиентите бараат тапети во повеќе простории од кога било, со посветли и посмели шари“, открива Деби Метјус, основачка и главна дизајнерка на Debbie Mathews Antiques & Designs.

Интересно е што дизајнерите сè почесто поставуваат тапети и на тавани – нешто што пред десет години било многу поретко.

Таванот повеќе не е заборавен дел од просторот, туку станува уште една површина за креативен израз.

Винтиџ текстили и стакло – предмети со приказна

Старите ленени чаршафи, порцеланските садови и декоративното стакло повторно стануваат омилени детали во домовите.

Причината е едноставна – секој предмет носи приказна.

„Секогаш уживам да пребарувам низ винтиџ садови, порцелан, ленени материјали и стаклени предмети бидејќи тие создаваат најинтересни комбинации за трпезата“, вели Метјус.

Особено популарни повторно стануваат купе чашите, кои се користат за коктели или десерти.

Без разлика дали се поставени на бар-количка како декоративен елемент или на трпезариска маса за гости, винтиџ деталите му даваат карактер на домот.

Многу уникатни предмети денес се пронаоѓаат во антикварници, продавници за половна стока, па дури и преку Facebook Marketplace.

Декоративни лајсни – архитектурата повторно станува важна

Современите сопственици сè повеќе сакаат простори со архитектонски карактер.

Решението често се декоративните лајсни и дрвените панели на ѕидовите (wainscoting).

Според Шерил Клендон од In Detail Interiors, декоративните елементи се повторно популарни поради нивната способност да додадат структура и софистицираност во домот.

Иако можеби изгледа како голема градежна интервенција, додавањето декоративни панели може да биде и интересен проект „направи сам“ со соодветни материјали.

Галериски ѕидови со стара уметност

Еден од најубавите начини да се спои минатото со сегашноста е создавање галериски ѕид со стари уметнички дела.

Потребно е трпение за да се соберат вистинските парчиња, но резултатот создава простор со личност и историја.

„Галериските ѕидови со винтиџ или стара уметност се лесен начин да се спојат минатото и сегашноста“, вели Клендон.

Денешниот тренд не е само копирање на старите стилови, туку нивно модерно толкување – на пример, класични портрети со современи интервенции како додавање силни бои.

Смели бои – враќање на карактерот во домовите

Ерата на целосно бели кујни и неутрални простории постепено се повлекува.

Дизајнерите повторно внесуваат живописни тапети, шарени завеси, смели апарати, силни нијанси на ѕидовите

Според Калeн, домовите повторно добиваат карактер каков што често имале старите куќи.

Во последно време се појавуваат и специфични трендови како ретро кујни во розови тонови и дневни соби во виолетови нијанси.

Антички огледала – мал детал со голем ефект

Не значи дека целиот дом треба да изгледа како музеј.

Понекогаш само еден ретро елемент е доволен за да внесе посебна атмосфера.

Античките огледала со богати рамки се еден од најлесните начини модерниот простор да добие допир од минатото.

Дизајнерката и антикварка Деби Метјус вели:

„Според мене, успешниот дизајн се базира на контрастот и мешањето на старото и новото.“

Ретро стиловите повторно се појавуваат затоа што луѓето црпат инспирација од претходните епохи, но ги прилагодуваат на современиот начин на живот.

Минатото не се враќа буквално, туку се преобразува за иднината.

Н.Т