Урбаната мода денес е синоним за удобност, минимализам и моќ. Таа нè научи дека костимот е новиот „must-have“, а широките панталони и сакоата со остри линии станаа униформа на модерната жена. Но, додека ја славиме практичноста, се поставува едно тивко, но важно прашање: дали со тоа ја изгубивме женственоста?
Фустанот некогаш беше центарот на женскиот стил – симбол на елеганција, мекост и самодоверба. Не беше резервиран само за свечености, туку и за секојдневието. Денес, пак, тој се носи „со причина“, додека костимот е избор без објаснување.
Современата мода ја наметна идејата дека за да бидеш сфатена сериозно, мора да изгледаш строго. Како женственоста да е спротивна на професионалноста. Костимот носи авторитет, но истовремено го прикрива личниот израз, емоцијата и спонтаноста што фустанот природно ги носи.
Вистинскиот моден баланс не е во заменување, туку во слободата. Да можеш да бидеш урбана и женствена. Во костим денес, во фустан утре. И во двата случаи – целосно своја.
Можеби е време урбаната мода повторно да ја прегрне женственоста. Не како тренд, туку како дел од идентитетот на современата жена.
Е.Л