Еден век во кујната: Како се менуваше срцето на домот

Од мала и строго функционална просторија до срцето на домот, кујната за еден век претрпе огромна промена.

Се менуваа технологијата, материјалите, боите и мебелот, но и начинот на кој луѓето го замислуваат семејниот живот.

Еве како еволуираше оваа просторија...

1920те: Кујната станува поорганизирана

Пред сто години кујната сè уште не била просторот што денес го замислуваме. Во многу домови имало шпорет, мијалник и одделни парчиња мебел за складирање и подготовка на храната. Фрижидерот сè уште не бил стандарден дел од домаќинството, а ледените кутии се користеле за чување храна. Просторот бил внимателно организиран за движењето и работата во кујната да бидат поефикасни.

1930те и 1940те: Хигиената и практичноста стануваат приоритет

Во овој период кујната станува посветла, почиста и подобро организирана. Белите површини и плочките биле популарни бидејќи создавале впечаток на чистота и полесно се одржувале. Втората светска војна дополнително влијаела врз материјалите и опремата. По војната, новите материјали и производи постепено почнале да влегуваат во домовите. 

1950те: Кујната станува дел од семејниот живот

Ако постои деценија што веднаш ја препознаваме по кујните, тоа се токму 50те.

Пастелните нијанси, ментол зелена, розова, светлосина и крем, се појавуваат на мебелот и апаратите. Фрижидерите и шпоретите веќе не морале да бидат само практични предмети, туку станале дел од изгледот на просторот. Кујната станува и симбол на модерниот начин на живеење и постепено се доближува до дневниот и трпезарискиот простор.

1960те: Технологијата влегува во кујна

Во 60те кујната станува сè поповрзана со идејата за модерен живот. Електричните апарати стануваат поважни, а вградените елементи овозможуваат кујната да изгледа како една целина. Интересно е што токму во овој период се појавуваат и кујни што биле замислени како статусен симбол, простор кој покажува дека домаќинството го следи технолошкиот напредок.

1970те: Кафена, зелена, смела и полна со карактер

Ако 50те биле пастелни, седумдесеттите биле многу посмели. Авокадо зелена, сончогледово жотла, портокалова, темно кафеава, дрвени елементи, ламинатни работни површини и впечатливи дезени се појавувале во голем број кујни. Кујната во овој период сè повеќе станувала место за собирање, а не само простор во кој се подготвува храната. 

1980те: Повеќе шкафови, повеќе опрема

Осумдесеттите донесоа кујни со многу складишен простор, дрвени фронтови и поголем број апарати. Дизајнот често бил потежок и декоративен отколку денес, со дрвени тонови, декоративни детали и различни текстури. Кујната сè уште најчесто била одделена од дневната соба, но идејата дека треба да биде удобен семеен простор станувала сè посилна.

1990те: Голема кујна за целото семејство

Во деведесеттите доминираат медено дрво, големи шкафови, бели или црни апарати и пространи работни површини. Кујната станува поголема и пофункционална. Во многу домови се појавуваат и првите поизразени премини кон отворен распоред, кујната, трпезаријата и дневната постепено почнуваат повеќе да комуницираат меѓусебно.

2000-тите: Кујната се отвора

Ова е периодот кога кујнскиот остров станува еден од најпрепознатливите елементи на модерната кујна. Ѕидовите меѓу кујната и дневната сè почесто се отстрануваат, а кујната станува простор во кој може да се готви, разговара, јаде, работи и поминува време со семејството. Нерѓосувачкиот челик, големите фрижидери, вградените апарати и пространи работни површини стануваат дел од новиот изглед.

Денес...

Денешната кујна е комбинација од кујна, трпезарија, дневен простор и место за дружење. Сè почесто се користат вградени апарати, големи острови, скриени складишни простори и природни материјали. Популарни се светлите и неутралните нијанси, дрвото и минималистичките линии.

Денес кујната често е центарот на домот, место каде што се подготвува храната, но и каде што семејството разговара, децата пишуваат домашна, се пие кафе и се пречекуваат гостите.