Иако Кинезите се „неколку генерации понапред“ во процесите на дизајн и производство на чипови, Соединетите Американски Држави ризикуваат да заостанат зад својот главен глобален конкурент кога станува збор за изградба на инфраструктурата за новите дата-центри.
Извршниот директор на американската компанија Nvidia, Џенсен Хуанг, предупреди дека САД би можеле да заостанат зад Кина во клучните сегменти на инфраструктурата за вештачка интелигенција – пред сè во брзината на изградба и националните енергетски капацитети.
Иако САД сè уште имаат предност во дизајнот и производството на AI-чипови, Хуанг за време на неодамнешен разговор со Џон Хамре, претседател на Центарот за стратешки и меѓународни студии (CSIS), истакна дека Кина е способна да реализира големи проекти со зачудувачка брзина. Дури и неверојатна!
„Ако сакате да изградите дата-центар овде, во Соединетите Држави, од почетокот на работите до пуштањето во функција на суперкомпјутер со вештачка интелигенција, веројатно ќе ви бидат потребни околу три години. Тие можат да изградат болница за еден викенд буквално“, изјави извршниот директор на Nvidia.
Хуанг, исто така, го постави прашањето дали САД располагаат со доволно енергетски ресурси за да ги задоволат сè поголемите потреби на високоперформансното компјутерство. Неговите забелешки доаѓаат во период кога операторите на дата-центри предвидуваат значително проширување низ целата земја, со инвестиции од повеќе милијарди долари, кои се очекува да го поттикнат брзиот раст на оптоварувањето од вештачката интелигенција.
„Кина има двојно повеќе енергија од Америка како држава, а американската економија е поголема од нивната. За мене тоа нема логика“, изјави Хуанг. Тој додаде дека енергетскиот капацитет на Кина продолжува да расте „линеарно“, додека американскиот останува речиси непроменет.
И покрај овие инфраструктурни предизвици, Хуанг нагласи дека САД и понатаму имаат значајна предност во технологијата на AI-чиповите. Сепак, тој предупреди дека „секој што мисли дека Кина не може да произведува, ја пропушта суштината“.
Хуанг се осврна и на политичкиот моментум во САД околу враќањето на производството во земјата и зголемувањето на инвестициите во вештачка интелигенција. Според него, економските приоритети на претседателот Доналд Трамп би можеле да ја поттикнат домашната индустрија и идниот развој на инфраструктурата, создавајќи пат за зајакнување на националните капацитети.
Колкава е просечната цена на еден дата-центар?
Колкава е просечната цена на еден дата-центар?Nvidia е само една од големите технолошки компании што вложуваат астрономски суми во изградба на дата-центри во САД, што, според проценките на експертите за Fortune, би можело да надмине 100 милијарди долари само во наредната година.
Раул Мартинек, извршен директор на DataBank, компанија која соработува со технолошки гиганти на изградба на дата-центри, изјави дека просечната цена на еден дата-центар се движи од 10 до 15 милиони долари по мегават (MW), додека типичен помал дата-центар бара околу 40 MW.
Со растот на капиталните трошоци, особено кај операторите кои планираат проширување на повеќе локации, проекциите за 5 до 7 гигавати нови капацитети се преведуваат во приближно 50 до 105 милијарди долари нова градба. Овие бројки јасно го покажуваат обемот на предизвикот со кој се соочуваат инвеститорите и развивачите на дата-центри.
Затоа, тие ќе мора да воспостават рамнотежа помеѓу брзото усвојување на вештачката интелигенција, капацитетите за изградба, достапноста на енергија и отпорноста на синџирите на снабдување – неопходни за реализација на некои од најголемите проекти за дигитална инфраструктура што некогаш биле преземени во Соединетите Држави, беше заклучено на дискусијата.