ВЕНЕЦИЈА 2026: ЖЕНИТЕ КОИ ГО ОСВОИЈА ЦРВЕНИОТ ТЕПИХ

Од 1.250 часа рачна работа на Chanel до винтиџ Armani од 1995: најсилните модни моменти од овогодишната Mostra

Венеција повторно потврдува дека филмскиот фестивал одамна не е само натпревар на филмови. На црвениот тепих се води и една друга, тивка конкуренција – која ќе ја претстави модата најубедливо, најинтелигентно и најнезаборавно.

И оваа година Lido-то е сцена на која се сретнаа haute couture, архивски парчиња, современ луксуз и новата генерација на модни ѕвезди. Vogue, British Vogue, Vogue France, Harper’s Bazaar и W Magazine веќе издвојуваат неколку изгледи кои особено се издвојуваат.

1. БХАВИТА МАНДАВА – CHANEL

Најимпресивната приказна на црвениот тепих

Ако треба да се избере еден изглед кој ја претставува високата мода во нејзината најбуквална смисла, тоа е креацијата на Bhavitha Mandava.

И British Vogue и Vogue France го издвојуваат нејзиниот спектакуларен Chanel „mermaid“ фустан, од Resort 2027 колекцијата на куќата. Но вистинската приказна е подлабока од самиот изглед.

Фустанот содржи 30.000 куполести sequins во форма на срце, во градација од иридентно небесносино до длабоко тиркизно, плус уште 96.000 овални sequins на воланите. Само везењето во ателјето Lesage траело околу 1.250 часа.

Резултатот е силуета која визуелно потсетува на кожа на сирена што излегува од вода. Наместо накитот да се натпреварува со фустанот, Mandava го оставила главниот ефект на самата конструкција- camellia брош, минимални обетки и едноставна коса.

Vogue ја стави меѓу најдобро облечените ѕвезди на неделата, опишувајќи го изгледот како еден од најгламурозните моменти од Венеција.

2. АМАЛ КЛУНИ – TOM FORD BY HAIDER ACKERMANN

Амaл Клуни повторно покажува зошто Венеција речиси може да се смета за нејзина лична модна сцена.

За отворањето на фестивалот таа избра црна, тесна Tom Ford by Haider Ackermann тоалета, со прецизно поставени набори и силно обликувана силуета. Беше елегантна без да биде старомодна, токму онаа граница помеѓу Hollywood glamour и современ минимализам што Клуни ја совладува исклучително добро.

Амaл е пример дека добро облечена жена не мора секојпат да носи најголем фустан на црвениот тепих.

3. КЕНДАЛ ЏЕНЕР – ВИНТИЏ ARMANI

Ова е еден од најпаметните избори на фестивалот.

За својот прв црвен тепих во Венеција, Кендел Џенер не избра нова couture креација. Наместо тоа, се врати во архивата на Giorgio Armani и облече златен, богато декориран фустан од есен/зима 1995 колекцијата, истата година во која е родена.

Фустанот има силен карактер од 90-тите, со златна флорална апликација и суптилен сјај. Џенер го остави фустанот да биде главната ѕвезда, со минимални детали и дијамантски обетки.

Овој избор е важен затоа што покажува една од најголемите тенденции на современиот црвен тепих: архивската мода веќе не е резервирана за модните познавачи – таа стана новиот статусен симбол.

4. СУКИ ВОТЕРХАУС – SAINT LAURENT

Suki Waterhouse пристигна во сосема поинаква естетика.

На премиерата на Primetime на 5 септември носеше златен Saint Laurent Pre-Fall 2026 мини-фустан, богато украсен, со проѕирни хулахопки и високи потпетици.

Изгледот намерно носи ретро-гламур, но не изгледа како костим. Разбушавената коса и релативно ненападната шминка ја спречуваат комбинацијата да стане премногу „готова“.

5. ВИТОРИЈА ЧЕРЕТИ – ARMANI PRIVÉ

Италијанската манекенка Виториа Черети пристапи кон трендот на „naked dressing“ на многу пософистициран начин.

Нејзиниот Armani Privé фустан има кадифена колумнарна силуета, додека горниот дел е транспарентен и прекриен со темни кристали и ситни текстилни детали.

Тоа е важна разлика: наместо голата кожа да биде главната порака, материјалот и неговата обработка ја создаваат илузијата.

Токму тоа е она што го разликува модниот експеримент од обична провокација.

6. МАРИАКАРЛА БОСКОНО – CHANEL

Mariacarla Boscono се појави во Chanel Cruise 2026/27, креација на Matthieu Blazy. Фустанот комбинира лесен твид, црно-бел принт налик на весник, конструкција со јазол, драматичен шлеп и огромна camellia со пердуви.

Ова не е фустан кој се обидува само да биде „убав“.

Тоа е модна композиција, текстура, принт, волумен, историја на Chanel и новата естетика на Blazy во едно парче.

Boscono со право го нарече „уметничко дело“.

7. НИКОЛА ПЕЛЦ – BALENCIAGA

Ако бараме нешто драматично, Nicola Peltz дефинитивно заслужува место.

За Kinéo Awards во Венеција таа избра виолетова Balenciaga тоалета со драматични cut-out отвори околу колковите и отворен грб. Истата вечер ја доби и наградата Rising Star.

Овој изглед е помалку суптилен од Chanel на Mandava или Armani на Jenner, но токму затоа функционира, силна боја, архитектонски линии и долга силуета.

Еве ги и останатите изгледи: