„Оставете ме да се облекувам како што сакам“: Дамата за која нема модни правила

За Џеневиф Пеги Џефс, модата никогаш не била прашање на вклопување во околината. Нејзината љубов кон впечатливите бои, необичните кроеви, накитот и шеширите е дел од нејзината личност уште од детството.

Денес, како претседателка на Peranakan Association Singapore, таа ја поврзува модата со културата и личниот идентитет, а нејзиниот препознатлив стил е мешавина од традиција, раскош и современ изглед. Таа е првата жена на чело на ова здружение во неговата 126-годишна историја.

„Модата живее во различноста. Во тоа да не ги копирате другите“, вели Џефс во интервјуто за Harper’s Bazaar Singapore. За неа, облекувањето е начин да се изрази нешто необично, да се покаже карактер и да се има храброст да се биде забележан. Нејзиниот стил е максималистички, таа сака бои, детали и парчиња што оставаат впечаток, наместо комбинации кои се вклопуваат со сите останати.

Нејзината љубов кон модата започнала уште од мала. Постарата сестра, која во тоа време била една од познатите манекенки во Сингапур, ја водела со себе и ѝ шиела фустани, здолништа со големи џебови и облека со впечатливи детали. Важна улога имала и баба ѝ од Индонезија, која била образувана на холандски и се облекувала во модерен, западен стил, наместо секогаш во традиционални комбинации.

Еден од највпечатливите моменти во нејзиниот живот бил нејзиниот втор брак, кога решила да ги изненади гостите со целосно црвена венчаница. Фустанот бил без прерамки, превезот од црвена чипка, чевлите црвени, а наместо букет носела голем црвен пердувест лепезник. Дури и вештачките трепки биле црвени. Тоа било нејзино целосно предавање на бојата која ја обожува.

Нејзината филозофија на облекување е едноставна: Да не се купува нешто само затоа што е модерно или затоа што го носат другите. Таа сака парчиња кои имаат карактер, а не облека што изгледа како готова комбинација од излог. Нејзиниот совет е да се избира она што навистина ни се допаѓа и што ни прилега, наместо слепо да ги следиме трендовите.

Во текот на животот, Џефс собирала шешири и впечатливи модни додатоци. Во еден период имала повеќе од 100 шешири, а љубовта кон нив со текот на времето прераснала во колекција на уникатни креации. 

Нејзиниот стил бил силно поврзан и со нејзината работа. Во Лондон, каде што живеела неколку години, имала бутик наречен Indochine, во кој продавала облека и модни парчиња од Југоисточна Азија, вклучувајќи винтиџ кимона, шалови и венчаници. 

Со годините, нејзиниот стил станувал уште поизразен. Денес Џефс точно знае што ѝ се допаѓа и што ја претставува. Таа не се облекува за да изгледа помлада, ниту за да ги задоволи туѓите очекувања. Нејзината цел е да изгледа како себе.

„Само оставете ме да се облекувам како што се облекувам“, е пораката што совршено го опишува нејзиниот став. Модата, според неа, не треба да има ограничувања поради возраста. Таа треба да биде лична, храбра и забавна, начин да уживаме во себе и да ја покажеме нашата индивидуалност.

Најдобрата комбинација не е секогаш наједноставната. Понекогаш, токму необичниот додаток, силната боја или парчето кое никој друг не би го избрал е она што нè прави незаборавни.