Oвие детали прават домот да изгледа поуредно

Домот не мора да биде совршено чист во секој момент за да изгледа уредно.

Понекогаш впечатокот го прават многу помали работи - што стои на масичката, каде се оставени чевлите, колку предмети има на кујнскиот пулт или дали перниците на софата се распоредени. Кога видливиот простор е помалку „зафатен“, целата просторија изгледа помирно и поорганизирано.

Чисти и што е можно попразни површини

Една од најбрзите промени е да ги ослободите површините од предмети кои постојано стојат таму. На клуб-масичката не мора да има далечински управувачи, сметки, чаши, свеќи и десет декоративни предмети. Една мала вазна, неколку книги или послужавник со внимателно одбрани детали често изгледаат многу поуредно. Исто важи и за комоди, полици и кујнскиот пулт. 

Убава корпа 

Корпите се едноставен трик за предмети кои мора да бидат при рака, но не мора постојано да бидат видливи. Ќебиња, играчки, списанија, далечински управувачи или ситници можат да имаат едно заедничко место. Наместо предметите да бидат расфрлани низ собата, една или две поголеми корпи создаваат чувство дека сè има свое место.

Скријте ги малите предмети што создаваат најмногу неред

Полначи, кабли, сметки, клучеви и разни ситници можат да направат и убаво уреден дом да изгледа хаотично. Не значи дека треба да ги фрлите или постојано да ги складирате далеку, доволно е да им одредите едно место. Мала кутија во фиока, декоративна кутија на полица или посебен сад за клучеви може да направи огромна визуелна разлика.

Во кујната оставете го пултот што е можно почист

Кујнскиот пулт е едно од местата каде најбрзо се создава впечаток на неред. Тоа не значи дека треба да биде целосно празен. Доволни се неколку предмети кои навистина ги користите – на пример кафемат, дрвена даска, вазна или сад со овошје. Сè останато што ретко го користите може да се тргне во шкаф. 

Во ходникот направете едно место за чевли и чанти

Ходникот често е првото место што го гледаме кога влегуваме дома, па таму нередот особено се забележува. Наместо чевлите да стојат расфрлани покрај вратата, одредете едно место – мала клупа со простор за складирање, полица или корпи. Истото важи и за чантите и јакните. Кога овие предмети имаат свое место, целиот влез изгледа посредено.

Не ја потценувајте моќта на добро наместениот кревет

Во спалната соба најголемата површина е креветот, па неговиот изглед има големо влијание врз целата просторија. Не мора да правите хотелска поставеност со десет перници. Доволно е постелнината да биде исправена, прекривката уредно поставена и перниците наредени. Кога креветот изгледа средено, и целата спална визуелно делува поуредно.

Наместо многу ситни декорации, изберете неколку поголеми

Премногу мали предмети на полици, комоди и масички можат да создадат чувство на натрупаност, дури и кога секој од нив е убав. Наместо десет мали украси, пробајте со една поголема вазна, една слика, растение или скулптура. Така окото полесно го „чита“ просторот, а собата изгледа почисто и пософистицирано.

А што со бањата?

И во бањата истото правило прави голема разлика. Наместо секој шампон, крем и козметички производ да стои расфрлан по мијалникот, дел од нив може да се соберат во една убава послужавник или корпа. Со тоа и многу употребувана бања може да изгледа помирно и поорганизирано.

Завесите исто така го менуваат впечатокот

Завесите се еден од оние детали кои често ги занемаруваме, а имаат големо влијание врз целата соба. Кога се поставени уредно и визуелно се поврзуваат со останатиот простор, собата може да изгледа посмирено и посложено. Особено убав ефект даваат лесни, долги завеси во неутрални тонови кои го оставаат прозорецот визуелно чист.