Жената со стил не следи мода - таа остава впечаток

Модата се менува. Стилот останува. А најубавите жени со годините стануваат сè посигурни во тоа кои се и што сакаат да кажат со начинот на облекување.

„Модата минува, стилот е вечен“, велел Ив Сен Лоран. И можеби токму во оваа реченица се крие разликата меѓу жена која само ги следи трендовите и жена која има свој препознатлив стил.

А тука ќе ја надоврземе и Коко Шанел и нејзината, можеби најпозната, мисла за женската елеганција: „Облечете се лошо и ќе го запомнат фустанот. Облечете се беспрекорно и ќе ја запомнат жената.“

Токму затоа добриот стил не мора да биде гласен. Понекогаш е доволно добро скроен капут, совршена бела кошула, квалитетна чанта и пар чевли во кои жената се чувствува како најдобрата верзија од себе.

„Елеганцијата не е да се забележите, туку да бидете запаметени.“ Така велеше Џорџо Армани, реченица што совршено го опишува стилот што не се обидува очајно да привлече внимание.

Има жени кои влегуваат во просторијата и веднаш ги забележувате. Не затоа што носат нешто екстравагантно, туку затоа што сè на нив изгледа природно.

А Одри Хепберн стилот го поврзуваше со нешто многу подлабоко од облеката. Нејзината позната мисла „Елеганцијата е единствената убавина што никогаш не исчезнува“ и денес звучи подеднакво современо.

Со годините, можеби токму тоа го учиме. Не мора секој тренд да биде наш. Не мора секоја нова боја да ни се допаѓа. Не мора да изгледаме помладо за да изгледаме убаво.

Најдобриот стил е оној во кој не се преправаме дека сме некој друг.

Дијана Вриланд, легендарната уредничка на Vogue, имала поинаков пристап: „Окото мора да патува.“ И навистина, интересниот стил не значи совршена комбинација составена според правила. Тој треба да има нешто неочекувано како интересен брош, необични очила, машка кошула со женствен блејзер или впечатлива боја.

Затоа жената со стил не изгледа како да излегла од каталог. Таа изгледа како да има своја приказна.

Можеби најубавата работа кај стилот е што тој не зависи од годините. На 25 можеме да експериментираме, на 35 да го препознаваме она што навистина ни прилега, а по 40-та да престанеме да се облекуваме за да импресионираме и да почнеме да се облекуваме за себе.

Модата може да ни покаже што е ново, но стилот покажува кои сме ние.