Што да направите со празниот агол во дневната соба

Празниот агол во дневната соба често останува последен на листата за уредување.

Наместо да го исполните со случајно парче мебел, подобро е да му дадете конкретна функција. Еве неколку добри идеи.

Мал агол за читање

Една удобна фотелја може целосно да го промени неискористениот агол. Додадете мала помошна масичка, подна ламба и едно меко ќебе и ќе добиете место кое навистина има причина да постои. Важно е фотелјата да биде со соодветна големина.

Големо зелено цвеќе

Ако аголот нема доволно простор за мебел, не мора да го преполнувате. Висок цвеќе во убава саксија може да внесе висина, текстура и природен елемент во просторот. Маслиново дрво, фикус или друга поголема собна билка се добар избор за агол кој изгледа празно, но не сакате да го оптоварите.

Подна ламба 

Понекогаш на празниот агол не му треба мебел, туку светлина. Висока, скулптурална, подна ламба може да биде доволна за да му даде карактер на просторот, а навечер создава поубава, помека атмосфера од едно централно светло. Особено убаво функционира покрај фотелја или мала масичка.

Тесна масичка

Ако аголот е покрај ѕид и има доволно простор за поминување, тесна масичка може да биде многу практично решение. На неа можете да поставите мала ламба, вазна, неколку книги или декоративен предмет, а долниот дел може да послужи за кошници или складирање. 

Полички што одат во висина

Кога немате многу поден простор, искористете го ѕидот. Неколку едноставни полици можат да соберат книги, фотографии, мали растенија и предмети што ви значат. Вертикалното решение е особено практично во помали дневни соби бидејќи не зазема многу простор на подот.

Не мора секој агол да биде исполнет

Ако дневната соба веќе има доволно мебел и декоративни детали, празниот простор може да биде намерен. Понекогаш токму малку „воздух“ помеѓу парчињата го прави ентериерот да изгледа посредено и поелегантно. Целта не е секој сантиметар да биде исполнет, туку просторот да изгледа балансирано.

Пред да купите нешто за празниот агол, погледнете што навистина му недостига на просторот. Ако сакате место за одмор, фотелја. Ако ви недостига зеленило, растение. Ако аголот е темен, ламба. Ако немате доволно простор за книги и ситници, полици. А ако дневната веќе е богато уредена, можеби најубавото решение е едноставно да го оставите аголот да „дише“.